Kremlge boysunğan Qırım akimiyeti yerli belediyeler bücet paralarını nasıl masraf etkenlerini diqqatnen közetecek. Bu aqta mart 1 künü Bağçasaray şeherinde ötkerilgen qırım akimiyetiniñ toplaşuvında haber etildi.
Rusiye yolbaşçısı Sergey Aksönov bildirgeni kibi, her afta maliye ve icraiy intizamınıñ riayet etilgeninen bağlı netice toplaşuvları keçirilecek.
«Cuma künleri umumiy yekün çıqarılacaq, her hafta da maliye ve icraiy intizamı boyunca toplaşuvlar keçirilecek. İşdeşler, vaqıt sert şekilde çare baqılmasını talap ete. Alınğan bütün vazifeler istisnasız er bir resmiy şahısnen becerilmek kerek. Programmalarnıñ, prezident ve Rusiye akimiyetiniñ avalelerini ömürge keçirmesini temin etip olamağanlar, özüne başqa iş yerni qıdırmalılar», - dep ayttı Aksönov.
Rusiye nezaret astında bulunğan qırım akimiyetiniñ matbuat hızmeti bildirgeni kibi, çıqışta bulunğan reis muavini Vitaliy Nahlupin devlet akimiyetiniñ icra organları tarafından bücet maliyesini işletkenlerinen bağlı malümatnı seslendirdi.
«Yanvar ayı içün bücetniñ masraf qısmınıñ icra etilmesinde eñ eyi köstergiçler Sudağ şeher belediyesi - 83,2%, Canköy belediyesi - 89,1% qazandılar. Becerüvniñ eñ alçaq seviyeni Yalta, Kefe, Aluşta şeherleri kösterdi» - dep qayd etti Nahlupin.
O, belediyeler idarecilerine bücet maliyeni daa çoq semereli qullanmağa tevsiye etip, bozuvlarnıñ izar etilmesi mesülietke ketirecegi aqta tenbiyeledi.
Ukraina Yuqarı Şurası 2014 senesiniñ 20 fevralni resmiy olaraq Qırım ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petr Poroşenko mütenasip qanunnı imza etti. Halqara teşkilâtlar Rusiye tarafından Qırımğa qarşı yapılğan işğal areketlerni qanunsız sayıp, onı takbih etti. Ğarp devletleri Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.
