Qırımda 2014 senesinden başlap makemeden tış 2 biñden ziyade inşaat demontaj etildi. Bu aqta Kremlniñ nezaret astında olğan Qırım nazirler şurasınıñ yolbaşçı muavini, Mihail Şeremet bildirdi. Onıñ qaydlarına köre, bu kibi inşaatlar qanunsız ve muvaqqattır.
Bu bildirmeni Şeremet Qırımda qanunsız inşaatçılıq problemi mevzusına bağışlanğan «tögerek masa» devamında yaptı. Şimdiki vaqıtta yarımadada yerlerniñ qanunsız qurulğan binalardan boşaltma boyunca komissiya çalışmaqta.
«Bu komissiyanıñ çalışması devamında bütün yarımadada makemeden tış eki biñden ziyade inşaat yıqtırıldı», – qayd etti Mihail Şeremet.
Onıñ fikirince, bugünki künde yarımadada qanunsız qurulğan binalar probleması ale daa aktual qalmaqta. Demontaj işlerni ömürge keçirgende ise, qırım memurları «Rusiyeniñ diger subyektlerniñ müsbet tecribesini» köz ögüne alacaqlar. Misal olaraq Moskvadaki binalarnıñ yıqması ketirildi.
Ukraina Yuqarı Şurası 2014 senesiniñ 20 fevralni resmiy olaraq Qırım ve Aqyar şeeriniñ işğali kününen ilân etti. Oktâbr 7 künü 2015 senesinde Ukraina prezidenti Petr Poroşenko mütenasip qanunnı imza etti. Halqara teşkilâtlar Rusiye tarafından Qırımğa qarşı yapılğan işğal areketlerni qanunsız sayıp, onı takbih etti. Ğarp devletleri Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.
