Aqmescitte energosaqlama rejimi kirsetile, bundan sebep müessiselerniñ çalışmalarını toqtatmaq qararı alındı.
Bu aqta Rusiye nezaret astında bulunğan Aqmescit Memuriyetiniñ matbuat hızmeti bildirmekte.
Berilgen malümatlarğa köre, qurucılıq işhaneleri de bu cedvelde bar.
«Pompa stantsiyaları ve başqa içtimaiy ceetten mühim olğan obyektler muhtar energosaqlama menbasına keçirilecek. «Krımtrolleybus» işhanesine elektronaqliyatnıñ çalışmasını vaqtınca toqtatmaq avale etildi. İçtimaiy ğıda müessiselerine fevral 29 künü 0:00 - den mart 1 künü 24:00 - ke qadar muhtar energosaqlama menbasına keçmege tevsiye etilgen», – dep bildirile mesacda.
Memuriyetniñ bildirgeni kibi, böyle tedbirlerniñ keçirilmesi «üçünci energokopürniñ bağlanması ve onıñ azırlıqlarınen bağlı.» Belgilengen vaqıtta Aqmescitte, cedvelge köre, devamlı ve sıralı ışıq söndürülmesi de mümkün.
Bundan evel haber etilgeni kibi, şeerde soqaqlardaki yarıq da iqtisat etilmesi içün söndürülecek.
Rusiye astında bulunğan Qırım akimiyetiniñ yaqarlıq ve energetika naziri Svetlana Borodulina fevral 29 künü «RİA Novosti» agentligine yapqan arizağa köre, Kubandan Qırımnıñ bazı rayonlarına elektroenergiya berilüvniñ sıñırlaması müstesna alında tamir işlernen bağlı. Qayd etilgeni kibi, energokopürniñ ekinci sırasınen bağlı işler aprel - mayıs aylarına qadar bitirilmege planlaştırıla.
Dekabr 30 künü Herson vilâyetinde yerleştirilgen elektrotayamanıñ ihtimal patlavı sebebinden Ukrainadan Qırımğa elektrik energiyasınıñ kelmesi toqtatıldı. Şimdiki vaqıtta Qırımğa 250 megavat bergen elektrik keçirme ağı tamir etilgen, lâkin yarımadağa onıñ temin etilmesi añlaşma bitkeni içün berilmey.
Şimdiki vaqıtta, Rusiye tarafından işğal etilgen Qırım kendi generatsiya, Rusiyeden generator tertibatı ve Kubandan yapılğan energo köpüri yardımı ile teminlene. Köpür böyle yükke dayanamay, bundan sebep sıq olğan qazalar yüz bermekte.Sakinlerniñ çoqusı regionlarğa köre adaletsizli üleştirüvğa şikâyet etmekteler.
Ukraina Yuqarı Şurası 2014 senesiniñ 20 fevralni resmiy olaraq Qırım ve Aqyar şeeriniñ işğali kününen ilân etti. Oktâbr 7 künü 2015 senesinde Ukraina prezidenti Petr Poroşenko mütenasip qanunnı imza etti. Halqara teşkilâtlar Rusiye tarafından Qırımğa qarşı yapılğan işğal areketlerni qanunsız sayıp, onı takbih etti. Ğarp devletleri Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini red etip, buña «tarihiy adaletniñ ğayrıdan tiklemesi» kibi baqa.
