Link açıqlığı

Bazarertesi künü, fevral 29, Rusiye nezaret astında bulunğan Qırım Yuqarı Mahkeme fevral 11 künü apis etilgen ve «terrorizmde» qabaatlanğan Müslim Aliyev, Emir - Üsein Kuku, Enver Bekirov ve Vadim Siruk ile bağlı şikâyet arizanı baqmaq kerek.

Bu aqta advokat Emil Kürbedinov bildirdi.

Mahkeme oturuşı yerli vaqıtqa köre saat 10:00 ve 11:00 ge tayin etilgen.

Fevral 11 künü, Qırımda, qırımtatarlarnıñ evlerinde bir sıra tintüvler keçirildi. Olarnıñ neticesinde 12 insan tutıp qapatıldı, sorğudan soñ çoqusı azat etildi. Rusiye nezaret astında bulunğan Qırım prokuror Natalya Poklonskaya «Hizb ut - Tahrir» adlı terroristik teşkilâtnıñ faaliyetinen bağlı cinayi işniñ açılması aqqında bildirdi.

Fevral 12 künü qapatılğan dört insannı Qırımdaki mahkeme apis etmek qarırını aldı. Aynı künü daa tahminen on tintüv keçirildi.

Qırımtatar halqınıñ Meclisi böyle areketlerni qırımtatarlarğa qarşı yapılğan yañı repressiyalar kibi tanığan. Bundan sebep Ukraina tiş işler nazirligi fevral 12 künü narazlıqnı bildirip, Rusiyege basımnı küçleştirmege çağırdı.

Ukraina Yuqarı Şurası 2014 senesiniñ 20 fevralni resmiy olaraq Qırım ve Aqyar şeeriniñ işğali kününen ilân etti. Oktâbr 7 künü 2015 senesinde Ukraina prezidenti Petr Poroşenko mütenasip qanunnı imza etti. Halqara teşkilâtlar Rusiye tarafından Qırımğa qarşı yapılğan işğal areketlerni qanunsız sayıp, onı takbih etti. Ğarp devletleri Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini red etip, buña «tarihiy adaletniñ ğayrıdan tiklemesi» kibi baqa.

XS
SM
MD
LG