Ukraina sıñırcıları Rusiye tarafından işğal etilgen Qırımnen memuriy sıñırda Mi - 8 adlı 4 tane uçaqnıñ uçqanını qayd etti. Bu aqta ukrain sıñır hızmetiniñ saytında bildirilmekte.
«Berdânsk otrâdı «Geniçesk» bölüginiñ sıñırcıları Qırım memuriy sıñırında rus aviatsiyanıñ uçuvını tesbit etti. Umumen, işğal etilgen yerniñ üstünde 4 tane Mi - 8 uçağı izar etildi. Olar uçuvlarını memuriy sıñırğa yaqın yapqanlar», - qayd etile mesacda.
Keçken seneniñ noyabr ayında Ukraina akimiyeti rus uçaqları içün ava boşluğını tolusınen qapatmaq qararına keldi. Bundan evel arbiy uçaqlar ve arbiy tranitlerni kerçekleştirgen uçaqlar içün yasaq kirsetilgen edi. Bunıñnen bir sırada Ukraina ava boşluğından rus arbiy ve ekili nasip yüküniñ traniti yasaq etilgen.
Ukraina Yuqarı Şurası 2014 senesiniñ 20 fevralni resmiy olaraq Qırım ve Aqyar şeeriniñ işğali kününen ilân etti. Oktâbr 7 künü 2015 senesinde Ukraina prezidenti Petr Poroşenko mütenasip qanunnı imza etti. Halqara teşkilâtlar Rusiye tarafından Qırımğa qarşı yapılğan işğal areketlerni qanunsız sayıp, onı takbih etti. Ğarp devletleri Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini red etip, buña «tarihiy adaletniñ ğayrıdan tiklemesi» kibi baqa.
