Link açıqlığı

Saatnıñ esas haberi

Çubarov: 2014 senesi fevral 26-dan soñ Qırım ve Ukraina içün er şey yapqanımıznı tüşündik


Qırımtatar Milliy Meclisiniñ yetekçileri insanlarnı 2014 senesi fevral 26 künü Qırım Yuqarı Radasına mitingge çağırğanda, Qırım Yuqarı Radasınıñ o vaqıttaki spikeri Vladimir Konstantinovğa «Rusiye ile siyasiy alış-verişke başlamağa» imkân bermemege tırıştılar. Mitingden soñ Mecliste «vaziyetni qurtarğanlarını tüşüne» ediler. Bunı Qrımtatar Milliy Meclisiniñ reisi Refat Çubarov «Qırım meselesi» leyhasınıñ çerçivesinde keçirilgen marafon devamında bildirdi.

«Biñlerce – em qırımtatarlar, em ukrainler, em digerleri… Andan özümizni, Qırımnı, Ukrainanı qorçalap olğanımıznı tüşünip kettik», – dedi Çubarov.

Refat Çubarovnıñ fikrine köre, fevral 26 künü Qırımnıñ vatandaşlıq cemaatı öz vazifesini becerdi, Rusiye ögünde «qanuniy» qapılarnı açmadılar. Şunıñ içün bir qaç saatten soñ Moskva diger planını işletti, ve sabağace Qırımnıñ memuriy binaları zapt etildi.

Qırım meselesinen oğraşqan onlarnen kütleviy haber vastaları «Qırım meselesi» leyhası çerçivesinde Qırımda işğalge qarşı çıquv künü munasebetinen marafon keçirdiler. Yayınnı UA: Perşiy, ATR, Çernomorskaya TRK telekanallarında, Hromadske.TV, Qırım.Aqiqatta, «Ukrainskaya pravda», «Tsentr jurnalistskih rassledovaniy», QHA, «Golos Krıma», Obşçestvennoye Radio saytlarında seyir etmek mümkün edi.

2014 senesi fevral 26-da QMC Yuqarı Radası yanında Ukrainanıñ topraq bütünliginiñ tarafdarları ve olarğa qarşı çıqqan Qırımnıñ şimdiki yolbaşçısı Sergey Aksenov reberliginde «Rus birligi» firqası faalleriniñ mitingi olıp keçti. Rusiye taqiqatınıñ malümatına köre, yüz bergen çatışmada eki insan elâk oldı, 79 kişi zarar kördi.

Ukrainada fevral 26-27 künleri Qırım Muhtar Cumhuriyeti işğaliniñ ekinci yıllığına bağışlanğan tedbirler keçirilmekte. «Qırım – Ukrainadır!» haber-bağ kampaniyası devam ete.

Ukraina Yuqarı Radası fevral başında «2016 senesi hatıra künleri ve yubileylerni qayd etüv» qararını qabul etti. Oña binaen fevral 26 künü devlet seviyesinde qayd etilecek.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG