Link açıqlığı

Qırımnıñ memuriy sıñırında Rusiye işğaline qarşı çıquv künü munasebetinen yürüş ötkerilecek


Herson vilâyetiniñ Geniçesk rayonında Rusiyeniñ Qırım işğaline qarşı çıquv künü avtoyürüş ve yürüş ile qayd etilecek. Bunı Qırım.Aqiqat mühbiri bildire.

Geniçesk rayonı devlet memuriyetiniñ reis muavini Gülnara Bekirova Qırım.Aqiqatqa bildirdi ki, yerli meclisler avtoyürüş keçirmege teklif ettiler. Yerli akimiyet de qoltuttı.

Bekirovanıñ aytqanına köre, Novoalekseyevka qasabasınıñ camisinde dua oqulacaq, soñra maşinalar ukrain ve qırımtatar bayraqlarını alıp, Geniçeskke ketecekler.

Qırım qamaçavı aktsiyasınıñ ştabı bildire ki, faaller avtoyürüşke qoşulmağa planlaştıralar. Bundan ğayrı, Rusiyeniñ Qırım işğaline qarşı çıquv kününe bağışlanğan yürüş ötkerecekler.

Ukraina Yuqarı Radası fevral başında «2016 senesi hatıra künleri ve yubileylerni qayd etüv» qararını qabul etti. Oña binaen fevral 26 künü devlet seviyesinde qayd etilecek.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG