Link açıqlığı

Qırım mahkemesi fevral 11-de yaqalanğan eki musulmannıñ appelâtsiyasını baqacaq – adliyeci


Rusiyege boysunğan Qırım Yuqarı mahkemesi fevral 29-da Müslim Aliyev ve Emir-Üsein Kukunıñ apiske alınmasından appelâtsion şikâyetlerini baqacaq, dep bildirdi adliyeci Emil Kürbedinov.

«Aliyev Müslim ve Kuku Emir-Üseinniñ (terrorizm ile qabaatlanğan Qırım musulmanları) apiske alınmasına bergen appelâtsion şikâyetlerim Qırımnıñ Yuqarı mahkemesinde 2016 senesi fevral 29-da saat 11:00 baqılacaq. Qalğanları – Siruk Vadim ve Enver Bekirov aqqında malümat şimdilik yoq», – dep yazdı Facebookta adliyeci.

Qırımda fevral 11-de qırımtatarlarnıñ evlerinde tintüvler olıp keçti. 12 insan yaqalandı, sorğulardan soñ çoqusı azat etildi. Qırımnıñ Rusiye prokurorı Natalya Poklonskaya «Hizb ut-Tahrir» terroristik teşkilâtınıñ» faaliyeti aqqında cinaiy iş boyunca 4 insan yaqalanğanını bildirdi.

Fevral 12-de yaqalanğan dört kişi apiske alındı. O künü daa tahminen on tintüv keçirildi.

Qırımtatar Milliy Meclisi buña qırımtatarlarğa qarşı repressiyalarnıñ yañı dalğası dep ayta. Ukraina Tış işler nazirligi fevral 12-de narazılıq bildirip, Rusiyege qarşı basqını arttırmağa çağırdı.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG