Türkiye Anayasa mahkemesi baş muhalifet gazetasınıñ eki jurnalistiniñ apiste tutulması olarnıñ aq-uquqlarını boza kibi qarar çıqarğan soñ olarnı azat ettiler.
Cumhuriyet gazetasınıñ baş muarriri Can Dündan ve bu neşriyatnıñ Ankara bürosınıñ reisi 2015 senesi noyabr 26-da casuslıq qabaatı ile yaqalanğan ediler. Olarnıñ apiske alınması halqara seviyede takbih etildi.
Erkekler devlet istihbarat hızmeti Suriyege silâ yollamağa yardım etkenini köstergen video derc etilgen soñ yaqalandı. Ekisini de milliy havfsızlıq içün telükeli ola bilecek malümatnıñ derc etilmesi ve silâlı terroristik teşkilâtqa yardım etüv ile qabaatladılar.
Cumhuriyet gazetası keçken sene mayıs ayında, neşirde aytqanları kibi, 2014 senesi yanvar 19-da çıqarılğan video levhalarını saytında yerleştirdi. Levhalarda körüne ki, politsiya hadimleri Türkiye Milliy İstihbarat Hızmetine ait olğan üç yük maşinasında qutularnı açalar. Gazetanıñ malümatına köre, qutularda silâ bar edi.
Türkiye prezidenti Recep Tayip Erdoğan gazetanıñ tarqatqan malümatını Türkiyeniñ vaziyetini kerginleştirmek ıntıluvı dep adladı.
Can Dündar ve Erdem Gül azat etilgen olsa da, olarnı ömür boyu apis cezası ile cezalandıra bileler. Mahkeme mart 25-te başlaycaq. Erkeklerge memleketni terk etmege yasaq etile.
