Ukrainler Rusiyeniñ Qırım işğaline qarşı çıquv kününde içtimaiy ağlarda flash mobqa başladılar. Bunı aktsiyanıñ teşebbüsçisi, Ukraina haber siyaseti naziriniñ Qırım işlerinden mesleatçısı Emine Ceppar Qırım.Aqiqatqa bildirdi.
«Bugünde-bugün Ukrainada bir mif bar, Qırımda 100% işğalge qoltutqan ve «tuvğan yurtunda» bahtlı yaşağan separatistler olğanını aytalar. Faqat öyle degil. Aksine olğanını tasdıqlağan bir şey bar – Qırımtatar Milliy Meclisi Qırım parlamenti yanında teşkil etken barışıq mitingi. Aman-aman 15 biñ Ukraina vatanperveri Qırım parlamentine işğalni resmiyleştirmege imkân bermedi. Fevral 26 künü – Qırım ve baqışları içün işğalciniñ baş nişanı olğan qırımtatarlarnıñ zorbalıqsız qarşılığınıñ timsalidir. «Fevral 26 işi» – Vatan oğrunda küreş timsalidir», – dedi Emine Ceppar.
Onıñ aytqanına köre, flash mobnıñ esas vazifelerinden biri – Qırımda Rusiyeniñ yarımada işğaline qoltutqan insanlar yaşağanını red etmektir.
Flash mob çerçivesinde içtimaiy ağlarnıñ qullanıcılarına Qırım işğaline qarşı çıquv kününde baş fotoresim yerine levha qoymağa teklif etile. Qırım ve qıtaiy Ukrainanıñ sakinleri, cemaat teşkilâtları ve nazirliklerniñ vekilleri aktsiyağa qoltuttılar.
Ukraina «Qırım – Ukrainadır!» haber-bağ kampaniyası keçirilmekte.
Belli ukrain jurnalistleri ve oyuncıları «öz Qırımını» tarif eteler. Kampaniya çerçivesinde levhalar azırlandı, meşur ve adiy ukrainler Qırım sakinlerine qoltutqanlarını bildireler. Ukrainanıñ teleradioyayın milliy şurası levhalarğa içtimaiy reklama statusını berdi. Böylece levhalarnıñ Ukrainanıñ merkeziy ve vilâyet telekanallarında kösterilmesi tevsiye etile.
Qırımnıñ kütleviy haber vastaları, şu cümleden ATR qırımtatar telekanalı ve Çernomorskaya teleradiokompaniyası kampaniyağa qoltuttı.
Qırım işğali ve Qırımdaki ukrainlerge qarşı yapığan siyasiy basqı aqqında vesiqalı film kelecek afta kösterilecektir. O da «Qırım – Ukrainadır» kampaniyasınıñ bir qısmı olacaq.
Qırım meselesinen oğraşqan onlarnen kütleviy haber vastaları «Qırım meselesi» leyhası çerçivesinde Qırımda işğalge qarşılıq künü munasebetinen marafon keçirecekler.
2014 senesi fevral 26-da QMC Yuqarı Radası yanında Ukrainanıñ topraq bütünliginiñ tarafdarları ve olarğa qarşı çıqqan Qırımnıñ şimdiki yolbaşçısı Sergey Aksenov reberliginde «Rus birligi» firqası faalleriniñ mitingi olıp keçti. Rusiye taqiqatınıñ malümatına köre, yüz bergen çatışmada eki insan elâk oldı, 79 kişi zarar kördi. Aqmescit SİZOsında yatqan Ahtem Çiygoz da bu iş ile qabaatlana. Mahkümler qabaatını tanımayıp, iş siyasiy sebeplerden açılğanını tüşüneler.
Fevral 15-te Qırımnıñ Yuqarı mahkemesi bu işni tekrar taqiq etilmesine yollamağa qarar aldı.
Rusiyede «Memorial» uquq qorçalayıcı merkezi «fevral 26 işiniñ» iştirakçileri, apiste yatqan – Ahtem Çiygoz, Ali Asanov ve Mustafa Degermenci siyasiy mabus olaraq tanıdı.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
