Lvivde fevral 26-27 künleri Rusiyeniñ Qırım işğaliniñ ekinci yıllığına bağışlanğan bir sıra tedbir keçirilecektir.
Bunı teşkilâtçılar – «KrımSOS» cemaat teşkilâtı, «Lvivdeki Qırım evi» qırımtatar medeniyet merkezi, Birinci Lviv kütüphanesiniñ yardımı ile Qırımtatar Milliy Meclisi ve MO «Dzıga» bildireler.
Fevral 26-da Birinci Lviv mediatekasında fotoressam Emine Ziyatdinovanıñ «Başqa ev yoq» ve Maksim Skaçkovnıñ «Qırım hatıraları» fotosergileri açılacaq. Belli Lviv rekordsmeni Öleg Skavış tramvaynı tişnen çeküv boyunca Ukraina rekordını qoyacaq ola.
«Böyle etip Oleg Qırım işğali meselesine diqqat celp etmek istey», – dep aytalar teşkilâtçılar.
Fevral 27-de Taras Şevçenko eykeli yanında Svoboda caddesinde «yarımadada insan aqlarınıñ bozulmasına» bağışlanğan «Krım» performansı keçirilecek.
Performansta 50 kişi iştirak etecek, olar yarımadada üküm sürgen vaziyetni ve siyasiy mabus, qaçırılğan ve öldürilgen insanlarnı añlatacaqlar.
«Dzıga» bediiy galereyasında Lugansktan köçip kelgen Yekaterina Pikunnıñ «Köçip kelgenniñ közlerinde Ukraina» fotosergisi açılacaq.
«Qırım – Ukrainadır» haber kampaniyası fevral 22-de – Rusiyeniñ yarımada işğaliniñ ekinci yıllığı munasebetinen başlandı. Belli ukrain jurnalistleri ve oyuncıları «öz Qırımını» tarif eteler. Kampaniya çerçivesinde levhalar azırlandı, meşur ve adiy ukrainler Qırım sakinlerine qoltutqanlarını bildireler. Ukrainanıñ teleradioyayın milliy şurası levhalarğa içtimaiy reklama statusını berdi. Böylece levhalarnıñ Ukrainanıñ merkeziy ve vilâyet telekanallarında kösterilmesi tevsiye etile.
Qırımnıñ kütleviy haber vastaları, şu cümleden ATR qırımtatar telekanalı ve Çernomorskaya teleradiokompaniyası kampaniyağa qoltuttı.
Qırım işğali ve Qırımdaki ukrainlerge qarşı yapığan siyasiy basqı aqqında vesiqalı film kelecek afta kösterilecektir. O da «Qırım – Ukrainadır» kampaniyasınıñ bir qısmı olacaq.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
