Moskvanıñ «Lokomotiv» futbol klubı fevral 25-te Avropa Ligasınıñ 1/16 finalında Türkiyeniñ «Fenerbahçe» taqımı ile keçirilecek matçta siyasiy şiarlarnıñ qullanmaması aqqında tenbiyeledi.
«Lütfen, bir de bir siyasiy şiarlardan vazgeçiñiz», – dep muracaat ete «Lokomotiv».
Rusiye İçki işler nazirligi «provokatorlarnıñ yapqanlarını tekrarlamamağa» çağırıp, bunı yapacaqlarnı «menfiy aqibetler» aqqında tenbiyeledi.
Fevral 16-da İstanbulda «Lokomotiv» ve «Fenerbahçe» matçında Rusiye taqımı 0:2 esabınen yutturdı. Oyundan soñ yarı imayeci Dmitriy Tarasov urbasını çıqarıp, Vladimir Putinniñ resimi ve «eñ nezaketli prezident» yazısı olğan maykasını kösterdi.
Futbol birlikleri Avropa birligi Rusiye futbolcısına qarşı taqiqat başlattı. UEFA bildirdi ki, Tarasov qaide bozğanı ile qabaatlana, çünki futbol oyuncılarına siyasiy, diniy ya da şahsiy şiar ve resimler ile iç çamaşırnı köstermege yasaq etile.
Türkiye keçken sene noyabr ayından Suriye sıñırınıñ yaqınlarında Rusiye cenk uçağını tüşürgen soñ Türkiye ve Rusiye munasebetleri kerginleşti.
