Link açıqlığı

Çeh Cumhuriyetiniñ paytahtı Pragada mart 17-19 künleri keçirilecek CRIMEANSOS Qırım ve qırımtatarlarğa qoltutuv hayriye festivaliniñ keçirilmesi planlaştırıla. «Eurovision» yır yarışınıñ ukrain milliy saylavında ğalip çıqqan qırımtatar asıllı ukrain yırcısı Jamala tedbirge davet etildi.

«Pragağa bir-eki künge kelip, işğalni takbih etmek ve Avropağa qırımtatarlarnıñ faciasını hatırlatmaq içün keçirilecek Avropa forumında iştirak etmege imkânıñız olur, belki», – dep aytıla festival müdiri Anton Litvinniñ Jamalağa içtimaiy ağlarda yollağan davetnamesinde.

Jamalanıñ cevabı şimdilik yoq.

Festival programmasına binaen, Qırımtatar Milliy Meclisiniñ reisi Refat Çubarov, tarihçı Gülnara Bekirova tedbirge qoşulacaqlar. Taras Berezovetsniñ «İşğal: Qırım adası» kitabı taqdim etilecektir.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG