Link açıqlığı

Qırımtatar Milliy Meclisi ve Girne universitetiniñ reberligi (qısmen tanılğan Şimal Qıbrız Türk Cumhuriyetiniñ bir şeeri – QA) işbirligi aqqında añlaştılar. Bunı Ukraina prezidentiniñ qırımtatar halqı işlerinden vekâletlisi Mustafa Cemilevniñ matbuat hızmeti bildire.

«Qırımtatarlarnıñ lideri, Ukraina halq deputatı, Ukraina prezidentiniñ qırımtatar halqı işlerinden vekâletlisi Mustafa Cemilev Girne universiteti ile belli añlaşmalar tizdi. Qırımlı studentler içün stipendiya programmalarınıñ açılması, içtimaiy-medeniy tedbirlerniñ keçirilmesi, studentler ve tecribe paylaşuvı planlaştırıla», – dep aytıla haberde.

Girne universiteti ve Qırımtatar Milliy Meclisiniñ işbirligi yedi yıldan ziyade devam etmekte. Cemilevniñ ofisi qayd ete ki, ileride yardımlaşma artacağına ümüt beslene.

«Bugünde-bugün işğal bitken soñ Qırımda semereli çalışa bilecek adamlarnı azırlamaq kerek. Bundan ğayrı, eminim, bizim studentlerimiz ukrain cemiyeti ve Şimal Qıbrız Türk Cumhuriyeti arasında bir köpür olacaqlar», – dep qayd etti Mustafa Cemilev.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG