KrımSOS cemaat teşkilâtı Qırım.Aqiqatnıñ yardımı ile fevral 27-de «İçtimaiy ağlarnıñ közlerinde işğal tarihı» fotosergisini taqdim etecek.
Leyha Facebook yazılarından Qırım işğali ve KrımSOS cemaat teşkilâtınıñ meydanğa ketirilmesi tarihını azırladı.
2014 senesi baarde KrımSOS Qırımda istilâ başlağanınen Qırımdaki bütün adise-vaqialarnı gece-kündüz Facebookta paylaşqan edi. Tezden teşebbüsniñ içtimaiy ağı işğalge qarşılıq platforması şekline keldi.
Eki yıldan soñ, 2016 senesi fevral 27-de, işğal tarihı Facebook yazıları galereyasında taqdim etilecek.
Leyha 2014 senesi fevral 27-den iyül 2-ne qadar künlerni qaplap ala. Sergide Rusiyeniñ Qırım işğalinden başlap KrımSOSnıñ Qırımdan ve Ukraina şarqından köçip kelgenlerge yardım etmek içün leyhalarnı ömürge keçirmege başlağan vaqıtqa qadar vaqialar aks ettirile.
Sergi «Autonomous» medeniyet merkeziniñ açılışı çerçivesinde taqdim etilecek.
«Autonomous» merkezi cemaat teşkilâtları, icadiy birleşmeler ve ayrı ressamlarnı birleştirecek.
Sergi yeri – Kyivdeki «Autonomous» medeniyet merkezi, Suvorov 9 soqağı.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
