Ukraina ükümeti yanındaki «Qırım evi» devlet müessisesi Kyivde «Autonomous» medeniyet merkezini aça. Bunı müessiseniñ matbuat hızmeti bildire.
«Qırım evi» Devlet müessisesi tamir işlerinden soñ Ukrainanıñ serbest qısmında vatandaş, cemaat teşkilâtı, icadiy birleşme ve ressamlar içün Qırımnıñ medeniy ayat merkezi olaraq «Autonomous» merkezini aça. Fevral 27-de saat 16:00 «Autonomous» medeniyet merkeziniñ açılışına davet etemiz», – dep aytıla ilânda.
Ziyaretçilerni resim, fotoresim, qırımtatar çalğı aletleri ve qıyafetlerini, «Qara deñiz» mültimedia lokatsiyası ve «Qoralar altında» installâtsiyası, em de Qırım qavesi ve tatlıları bekley, dep bildire matbuat hızmeti.
Kyivdeki medeniyet merkezi Suvorov, 9 soqağında yerleşmekte.
Sentâbr 11-de devlet müessisesi vatandaşlarğa muracaat etip, köçip kelgenler içün binanıñ tamir işlerine yardım etmege rica etken edi. 43 biñ grivna toplanacaq edi.
Ukrainanıñ fevqulâde vaziyetler hızmetiniñ malümatına köre, fevral 23-ke qadar vaqtınca işğal etilgen Qırım ve arbiy areketler keçirilge Donbasstan Ukrainanıñ diger regionlarına 1 mln 28 biñ 808 insan köçip keldi, şu cümleden, Qırım Muhtar Cumhuriyeti ve Aqyar şeerinden – 21 biñ 893 kişi.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
