Link açıqlığı

«Eurovision» yarışınınıñ ukrain saylavından soñ türk haberlerinde, yerli gazetalarda Jamalanıñ yırı aqqında yazmağa başladılar, dep ayttı TRT telekanalınınh rejisseri Neşe Sarısoy Karatay Qırım.Aqiqat mühbirine.

Onıñ aytqanına köre, «Jamala internette fenomen oldı», ve yırcını yarıştan evel bu yırnen Türkiyege davet etmek kerek.

«Türkiye ve türk halqı, tabiiy ki, qoltutacaqtır. Çünki qırımtatarlar ve türkler – aynı ananıñ eki balası. Olarnıñ acısı – bizim acımız, bizim quvançımız – olarnıñ quvançı. Faqat bu sene Türkiye TRT aza memleketler arasında sınıf farqı körülgeni içün Eurovisionda iştirak etmey. İştirak etse edi, bütün reylerimiz Jamalağa keter edi», – dep ayttı Neşe Sarısoy Karatay.

Onıñ fikirince, Jamala «muzıka keyfiyeti içün birinci yer qazana bile».

«Birinci olmasa bile, insanlarnıñ yüreklerinde birinci olacağına inanam. Bilesiñiz, Eurovision yır yarışında reylerge siyasiy dostluqlar, aqraba cemiyetleri ve qomşulıqlar menfiy tesir ete. Kerçekten, yırğa rey berilse, diger yırlarnı eşitmedim, amma insanlıqnıñ aynı yarası ve acılarından olğan sürgün mevzusına kelgeni içün acayip bestesi ve mükemmel sözlerinen Jamala birinci yerge lâyıq. Zaten Avropa muzıka alanında endi-endi yanğıramağa başladı «1944» yırı. Jamala insanlıq acılarına diqqat celp ete. Qırımtatarlarnıñ ordusı yoq, Milliy neşriyatı yoq, halqı dört bir yana dağılğan, vatanları Rusiye tarafından işğal etilgen. Sürgünlikten yoq olması beklengen bir millet küllerinden yañıdan doğup, yañı qaramanlarnı çıqara», – dep qayd etti türk rejisseri.

Jamala qırımtatar halqınıñ faciası aqqında «1944» yırını taqdim etti. Onıñ sözlerine köre, bu kün – «hatıra. Bu yıl biñlerce qırımtatarnıñ ayatını deñiştirdi. Yırcı sms-rey berüvde seyircilerniñ eñ çoq sesini qazandı. 300 biñden ziyade insan rey berdi.

Qırım Muhtar Cumhuriyetiniñ sakinleri rey berüvge qoşulıp olamadı, çünki Rusiye tarafından işğal etilgen Qırımda ukrain mobil operatorları çalışmay.

Qırımtatar Milliy Meclisiniñ reisi Refat Çubarov dey ki, Qırımda mobil operatorları yarımada sakinlerine Ukraina içün rey bermege musadere etmedi.

Ukraina prezidentiniñ matbuat kâtibi Svâtoslav Tsegolko dey ki, Jamala «1944» yırı ile «Eurovision yarışında dünyada qırımtatarlarğa qarşı cinayetler aqqında hatırlatır.

Ukraina bıltır «Eurovision-2015» yarışında iştirakindenvazgeçti. Sebepler arasında ukrain topraqlarınnı zaptı ve Donbass arbiy ziddiyeti qayd etilgen edi.

Ukraina «Eurovision» yarışını 2005 senesi qabul etti. Ğalebeni 2004 senesi Ruslana Lıjiçko qazandı, aynı şu senesi Ukrainada nam qazanğan artisti unvanını qazandı.

XS
SM
MD
LG