Link açıqlığı

Qırımda qırımtatarlarnıñ milliy qaramanı Noman Çelebicihannıñ hatırasına levha çıqarıldı


Qırımda 1918 senesi fevral 23-de bolşevikler tarafından öldürilgen qırımtatar milliy qaramanı Noman Çelebicihannıñ hatırasına levha çıqarıldı.

QHA saytınıñ malümatına köre, levhanı Enver Cancak, Emine Mustafayeva, Ahtem Mecit, Lenora Dülberova azırladılar.

Noman Çelebicihan 1885 senesi molla qorantasında dünyağa keldi. Bağçasaray, İstanbul ve Sankt-Peterburgda oqudı, qırımtatar yaşlarınıñ maarif ve inqilâp teşkilâtlarında iştirak etti. Çelebicihan – qırımtatarlarnıñ «Ant etkenmen!» milliy gimniniñ müellifidir.

Fevral inqilâbından soñ Qırım müftisi oldı, soñra – birinci Qırımtatar Milliy Qurultayınıñ reisi. 1918 senesi yanvar ayında bolşevikler tarafından apiske alındı, fevral 23-te Aqyar apishanesinde öldürildi. 33 yaşında Noman Çelebicihannıñ cesedi deñizge atılğan edi.

Qırımtatar siyasiy ve devlet erbabı Noman Çelebicihannı añma aqşamı Kiyevde fevral 23-te keçirilecektir. Bunı tedbir teşkilâtçıları – Ukraina Milliy edebiyat müzeyi, «Alraid» cemaat teşkilâtları bütünukrain birligi, İslâm medeniyet merkezi (Kyiv ş.) ve «Tamğa» medeniyet ve esnaf merkezi bildireler.

XS
SM
MD
LG