Ukraina Tış işler nazirligi Rusiyeden «Qırım işğalini, repressiya ve Qırım yarımadasınıñ ukrain vatandaşları ve Ukraina tarafdarlarına qarşı tariklerni toqtatmağa» talap ete. Bu aqta Ukraina nazirliginiñ beyanatında aytıla.
«Eki yıl evelsi Rusiye Federatsiyası, Ukrainağa qarşı silâlı istilâsına başlap, cenkten soñ tarihnı ğayrıdan yazmağa başladı, halqara uquq qaidelerini bozdı. Rusiye medeniy dünya qısmından devlet –firqağa çevirildi. Yeşil kiyingen Rusiye abiyelri melez cenkiniñ timsalleri oldı, olarnıñ ukrain Qırımında bulunması Kreml tarafından halqara uquq ve insan aqlarınıñ körmemezlikke urulmasına yol açtı», – denile beyanatta.
Ukraina Tış işler nazirliginde deyler ki, «Rusiye işğali altında Qırım «renksiz bir zona» oldı.
«İşğalci akimiyeti vatandaşlarnıñ esas aq ve serbestligini boza, dissidentlerge qarşı gizli cenkni alıp bara, ukrainlerniñ ve Qırım tamır halqı olğan qırımtatarlarnıñ til, diniy, medeniy hususiyetlerini yoq ete. Rusiye akimiyetiniñ areketleri işğalcilerniñ qanunsız areket tarzını tasvir ete», – deyler nazirlikte.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
