Qırımdan mecburen köçip kelgen Qırım qamaçavı boyunca vatandaşlıq aktsiyasınıñ iştirakçisi Evelina Arifova vatandaşlarnı «Rusiye malını blok etmege» çağırdı.
«Bütün vatandaşlarğa, Ukraina vatanperverlerine muracaat etip, Rusiye malını blok etmege rica etem. Körgenimiz kibi, biz bunı becerdik. Çagıram: ne yük maşinalarını kirsetmek, ne malımıznı anda yollamaq, ne olarnıñ malını mında kirsetmek. Yani, tam qamaçav, bütünley», – tarif etti Qırım.Aqiqatqa Evelina Arifova.
«Bu memleketniñ yolbaşçılığı bizge ücüm etti, bizim yaşlarımız vefat ete, olarğa qamaçavnı ilân etmege tam aqqımız bar, mecburmız. Bunı cenkniñ başında etmege kerek edik», – dey Arifova.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı tarihiy adaletniñ tiklenmesi dep adlay.
