Ukraina milliy strategik araştırmalar institutınıñ müdiri Vladimir Gorbulin Qırımnıñ işğalden azat etilmesi içün qırımlılardan ibaret olacaqt batalyonnı tşekil etmek ğayesine qol tuttı. Bunı o Kiyevde matbuat konferentsiyasında ayttı.
«Men qol tutam (batalyonıñ teşkil olunuvına – QA). Qırımtatar askerleriniñ böyle bir bölüginiñ olması, menimce, partizan cenki usulıdır. Ne içün ondan vazgeçmek kerkmiz? Menimce, doğru bir yanaşuvdır», – dey o.
Gorbulin Ukrainağa Qırımnıñ azat etilmesi içün diger usullarnen birlikte partizan cenki usulından da faydalamanğa kerek olğanını qayd etti. Ukrain-türk bölüginiñ teşkil etilmesi umumiy sıñır olmağanından sebep mümkün degil, dedi o.
Yanvadle böyle bir batalyonnı teşkil etmek ğayesi aqqında qırımtatar halqınıñ milliy yetekçisi Mustafa Cemilev bildirgen edi.
Ukraina akimiyeti Qırım batalyonınıñ teşkil etilmesi ile bağlı qararnı almadı.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı tarihiy adaletniñ tiklenmesi dep adlay.
