Aqmescit rayonında fevral 18 künü Halqara ana tili kününe bağışlanğan «Til – halqnıñ canıdır» icadiy yarışına yekün çektiler.
Aqmescit rayonınıñ memuriyeti reisiniñ muavini Ruslen Yakubov aytqanı kibi, yarış 5 namzetlikte keçirildi: «Aile adetleri nedir ve nege kerektir?», «Aile adetleri», «Nesiller arasında bağ saqlanılmasınıñ müimligi», «Baar şiiriyetini diñleñiz…», «Acayip insanlarnıñ ayatından».
«Qırım Cumhuriyeti çoq milletlidir. Mında tınçlıqta bir 100 millet vekili yaşay. Er bir halq – tekrarlanmaz medeniyet, til, adet, yaşayış tarzıdır. Qırımda yaşağan halqlarnıñ tilleriniñ saqlanuvı medeniyetimizni zenginleştirgen bir usuldır», – dey Ruslan Yakubov.
Kremlge tabi olğan Aqmescit rayonı memuriyetiniñ matbuat hızmetinde bildirilgeni kibi, yarış ğalipleri 12 yerni qazandı. Er bir ğalipke rus-ukrain-qırımtatar luğatlarını bağışladılar.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı tarihiy adaletniñ tiklenmesi dep adlay.
