Link açıqlığı

Uquq qoruyıcılar Qırımda musulmannıñ evinde 3 saat devamında tintüvni keçire edi – Smedlâyev


Aqmescitte Kurtsı qasabasında fevral 18 künü dinni kütken musulmannıñ evinde tintüv keçirildi. Edebiyat ve haber diskleri tutıp alındı. Bunı Qırım.Aqiqatqa Qırımtatar Milly Qurultayınıñ merkeziy saylav komissiyasınıñ reisi Zair Smedlâyev bildirdi.

«Tintüv imanlı musulmannıñ evinde keçti. Özü evinde yoq edi, balaları, çağına yetmegen balaları da şu cümleden, evde ediler. Silâlı insanlar keldi, vesiqalarnı köstermeyip, tintüvni keçirdiler, amma neticede iç bir protokolnı bermediler», – dey Smedlâyev.

O şunı da qayd ete ki, bu tintüv qırımtatarlarnıñ evlerinde bundan evel olğan tintüvlerge bağlı ola bile.

Qırımtatar Milly Qurultayınıñ merkeziy saylav komissiyasınıñ reisi dey ki, işbu tintüv 2014 senesi baarde cansız alda tapılğan qırımtatar faali Reşat Ametovnıñ yaşağan bağça birliginde keçti.

Uquq qoruyıcı organlarınıñ Kurtsı köyünde keçken tintüvler aqqında resmiy malümat yoq.

İçtimaiy ağlarda bildirilgeni kibi, tintüv Akim Bekirovnıñ evinde keçirilgen edi.

Fevral 11 ve 12 künleri Qırımda qırımtatar faalleriniñ evlerinde tintüvler keçirildi. Uquq qoruyıcınıñ yaqalanuvı aqqında haber etken ediler. Qırımtatar Milliy Meclisi reisiniñ birinci muavini Nariman Celâlnı prokuraturağa çağırdılar. Uquq qoruyıcılar işbu vaqialarnı izaatlamay.

Qırımnıñ Rusiye FSB idaresi tarafından «Hizb ut-Tahrir» terroristik teşkilâtında faaliyet» cinaiy işiniñ çerçivesinde dört insan yaqalanğan. Bunı akimiyet tarafdarı olğan «Krıminform» haber agentligine Qırımnıñ Rusiye prokurorı Natalya Poklonskaya bildirdi.

Ukraina musulmanları diniy idaresiniñ reisi Said İsmagilov dey ki, fevral 11 künü qırımtatarlarnıñ evlerinde tintüvler Qırım musulmanlarını «terrorist» olaraq köstermek içün yapılğan. Bunı o, tintüvlerge oğrağan 12 insannıñ adını berip, Facebookta yazdı.

Aqmescit şeeri Kiyev rayon mahkemesinde fevral 11 künü yaqalanğan qırımlılarnıñ – Emir Üsein Kuku, Enver Bekirov, Müslim Aliyev ve Vadim Siruk – işi boyunca mahkeme toplaşuvı keçti. Olarnı Rusiye Federatsiyasınıñ CK 250 maddesi 2 qısmı boyunca qabaatlaylar («Terroristik teşkilâtnıñ teşkil etilmesi ve bu kibi teşkilâtta iştirak»). Mahkeme 2016 senesi aprel 8-ne qadar apis cezasını belgiledi.

Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı tarihiy adaletniñ tiklenmesi dep adlay.

XS
SM
MD
LG