Link açıqlığı

Qırım ombudsmeni Zair Akadırovnıñ yaqalanması vaqtında uquq qoruyıcılarnıñ areketlerinden çorlana – bloger


Qırımda insan aqlarından vekâletlisi Lüdmila Lubina bloger Zair Akadırovnıñ yaqalanuvı vaqtında uquq qoruyıcılarnıñ areketlerinden çorlana. Bunı Facebookta Akadırovnıñ özü yazğan.

Onıñ sözlerine köre, Lubina Qırım blogeri ile körüşti ve Akadırovnıñ şikâyetini ögrengenini bildirdi. Şunı da dey ki, Lubina politsiya hadimlerine onı ekstremizmge qarşılıq merkezine alıp ketmege bermegen «ziddiyetke qarşıqan cemaatçılıqnıñ rolüni qayd etti.

«Şikâyetime kelgende, ombudsmen degeni kibi, federal qanunı oña uquk qoruycı organlarınıñ işine qarışmağa çare bermey. Aynı zamanda, Lubina aytqanına köre, o bu meselede yardımcı olmağa istey. Onıñ tarafından bu arizamnı Qırımnıñ İçki işler nazirligi ve Taqiqat komitetine yollamağa teklif keldi», – denile beyanatta.

Zair Akadırov şunı da qoştı ki, Lüdmila Lubina blogerge qarşı politsiya hadimlerinden olğan laf qorquzuvlarnı da qayd etti.

«Bundan soñ vekâletliniñ teşebbüsi ile subetimiz «fevral 26 işi» boyunca mahkeme esnasınıñ muzakeresine keçti. Lüdmila Lubina, fikrime köre, aselet bu işke diqqat ayırdı ve bir de bir qıymetni keçti. Birinciden, onı «siyasiy» dep adladı. Ve 2014 senesi fevral 26 künü olğan vaqialarnıñ hatırası ile paylaştı».

Qırım blogeri Zair Akadırov Qırım Rusiye prokuraturasına Aqmescitte yanvar 15 künü onı yaqalamağa tırışqan politsiya hadimleriniñ qanunsız areketleri boyunca qararlarnı almağa ve teşkerüvni keçirmege ricası ile muracaat etken edi.

Yanvar 15 künü Qırım Yuqarı mahkemesiniñ binası yanında, «fevral 26 işi» boyunca mahkeme toplaşuvınıñ başlanmasını beklegen qırımtatar jurnalisti Zair Akadırovnı yaqaladılar. Zair Akadırovnı onıñ zenaat faaliyeti aqqında soraştırdı ve bir saat devam etken sorğudan soñ azat ettiler. Bunıñ ile, jurnalistniñ aytqanına köre, onı mecburen Ekstremizmge qarşılıq boyunca merkezge alıp ketmege istey ediler, qorquzdılar.

Qırım Rusiye tarafından işğal etildi.

XS
SM
MD
LG