Qırımtatar Milliy Meclisiniñ reisi Refat Çubarov Rusiye nezareti altında olğan Qırım prokuraturasınıñ Meclis faaliyetini yasaqlamağa niyetini izaatladı. Onıñ fikrine köre, böyleliknen, Qırım tamır halqına «öz sesinen aytmağa» yasaq eteler.
Çubarovnıñ fikrini Qırımtatar Milliy Meclisiniñ matbuat hızmeti aşkâr etti.
«Qırımtatar Milliy Qurultayı tarafından saylanılğan qırımtatarlarnıñ temsiliy organı olğan Meclis BMT tamır halqları aqlarınıñ beyannamesiniñ qaidelerine riayet ete. Milliy idare institutlarını teşkil etkenimizde beyanname daa qabul etilmegen edi, amma tamır halqlarınıñ aqları aqqında halqara senetler bar edi», – dedi Çubarov ATR telekanalına.
« Bugün işğalci akimiyet qırımtatar halqına öz sesi ile aytmağa yasaq etecek ola. Bugün işğalci akimiyet ırımtatarlarnıñ tarafından milliy organ olaraq saylanılğan Meclisni yoq etmege tırışqanını nazarğa alsaq, ekspertler Rusiye qırımtatarlarğa qarşı daa da beter areketlerni etmege azırlanğanı aqqında ayta», – dey o.
Poklonskaya işbu qararnı añlatqanı kibi, «soñ zamanları Qırım cumhuriyeti prokuraturasına qırımtatar ealisi tarafından Rusiye Fedeartsiyasında resmiyleştirilmegen teşkilâtnıñ faaliyetini qanunsız ve tarik etici olaraq tanımağa ricası ile muracaatlar kele».
Oktâbr 23 künü Rusiye Federatsiyasınıñ Cemaat palatası Rusiye Baş prokuraturasına muracaat etip, Qırımtatar Milliy Meclisiniñ faaliyetini ekstremizmge teşkermege rica etti. Böyle muracaatnıñ sebeplerinden biri – Qırımnıñ Herson vilâyeti tarafından «ticariy» qamaçavı oldı. Qırımnıñ rusiyeli prokurorı Natalya Poklonskaya Meclisniñ «ekstremist teşkilât» olaraq tanılacağını ve faaliyetiniñ yasaq etilecegini nazarda tutqanını bildirgen edi.
Rusiye Qırımnı 2014 senesi baarde işğal etkeninden soñ, qırımtatarlarnıñ yetekçileri Refat Çubarov ve Mustafa Cemilevge yarımada kirişini beş yılğa yasaq ettiler.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
