Link açıqlığı

Saatnıñ esas haberi

«Asker» teşkilâtı Qırım ile memuriy sıñırda hızmet etmek içün azırlanmağa devam ete


«Asker» vatandaşlıq birliginiñ faalleri ukrain sıñırcıları ile Qırım ile memuriy sıñırda birlikte hızmette turmaq içün azırlanmağa devam ete.

Bunı Qırım.Aqiqatqa «Asker» birliginiñ reisi, Novoalekseyevka qasabasınıñ Meclis reisi Veyser Sarıbelâlov bildirdi.

Onıñ aytqanına köre, şimdi zaruriy vesiqalar azırlanıla, faaller bütün kerekli protseduralardan keçip, nevbetke turacaqlar.

Bunıñ ile müddetleri şimdilik belgisizdir.

«Asker» vatandaşlıq birligi Qırım qamaçavı boyunca vatandaşlıq aktsiyasınıñ iştirakçileri tarafından teşkil etildi.

Faallerniñ sözlerine köre, öz işini göñülli olaraq becerecekleri içün aylıqnı almaycaqlar. Amma arbiy urba olarğa yardım olaraq Türkiyeden yollanılğanını qayd ettiler.

Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı tarihiy adaletniñ tiklenmesi dep adlay.

XS
SM
MD
LG