Rusiye uquq qoruyıcısı, Qırımda Alan uquq qoruyıcı merkeziniñ idarecisi Aleksandra Krılenkova dey ki, fevral 16 künü Cankoynıñ Elif bala merkezinde kene prokuratura temsilcileri kelip, «vatandaşlar muracaatlarınıñ baqılması» çerçivesinde vesiqalarnı köstermege talap ettiler.
«Bu sefer teşkerüv sakince keçti – silâlı insan yoq edi. Tek prokuratura hadimleri. Ve iş kününiñ soñunda, bala olmağanda, keldiler», – yazdı Facebookta Krılenkova.
O şunı da qayd etti ki, qanuniy bozuluvlar yüz bergen edi.
«Şu cümleden, teşkerüv tenbisiz keldi, talaplarda vesiqalarnı taqdim etmek içün nasıl bir müddet berilgeni qayd etilmegen edi, olarnı acele köstermege talap ettiler», – dey uquq qoruyıcı.
Qırım Rusiye prokuraturasınıñ bu aqta izaatı yoqtır.
Üç afta evelsi bala merkezinde SES, Fevqulâde vaziyetler nazirligi ve FSB iştiraki ile teşkerüv endi keçirilgen edi.
Fevral 11 ve 12 künleri Qırımda qırımtatar faalleriniñ evlerinde tintüvler keçirildi. Uquq qoruyıcınıñ yaqalanuvı aqqında haber etken ediler. Qırımtatar Milliy Meclisi reisiniñ birinci muavini Nariman Celâlnı prokuraturağa çağırdılar. Uquq qoruyıcılar işbu vaqialarnı izaatlamay.
Qırımnıñ Rusiye FSB idaresi tarafından «Hizb ut-Tahrir» terroristik teşkilâtında faaliyet» cinaiy işiniñ çerçivesinde dört insan yaqalanğan. Bunı akimiyet tarafdarı olğan «Krıminform» haber agentligine Qırımnıñ Rusiye prokurorı Natalya Poklonskaya bildirdi.
Ukraina musulmanları diniy idaresiniñ reisi Said İsmagilov dey ki, fevral 11 künü qırımtatarlarnıñ evlerinde tintüvler Qırım musulmanlarını «terrorist» olaraq köstermek içün yapılğan. Bunı o, tintüvlerge oğrağan 12 insannıñ adını berip, Facebookta yazdı.
Aqmescit şeeri Kiyev rayon mahkemesinde fevral 11 künü yaqalanğan qırımlılarnıñ – Emir Üsein Kuku, Enver Bekirov, Müslim Aliyev ve Vadim Siruk – işi boyunca mahkeme toplaşuvı keçti. Olarnı Rusiye Federatsiyasınıñ CK 250 maddesi 2 qısmı boyunca qabaatlaylar («Terroristik teşkilâtnıñ teşkil etilmesi ve bu kibi teşkilâtta iştirak»). Mahkeme 2016 senesi aprel 8-ne qadar apis cezasını belgiledi.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı tarihiy adaletniñ tiklenmesi dep adlay.
