Kiyevde «SSCBde, 1991-2013 seneleri ve bugün Ukrainada qırımtatarlarnıñ meselesi» serlevalı munaqaşa keçirilecek. Teşkilâtçılarnıñ aytqanı kibi, tedbir «Knıgarnâ «E» tükânlarından birinde fevral 23 künü «Ev.Deñişüvler» leyhasınıñ çerçivesinde keçirilecek.
Munaqaşa iştirakçileri – tarihçı, siyasiy ilimler nazmeti, Qırım.Aqiqat müellifi Gülnara Bekirova, konfliktolog, Qırım ve qırımtatarlar boyunca maqalelerniñ müellifi Natalya Belitser ve siyasetşınas, Siyasiy taqiqtlar ukrain mustaqil merkeziniñ eksperti Yuliya Tişçenko.
Tedbir devamında iştirakçileri qırımtatarlarnıñ Qırımda Rusiye işğalinden evel ve soñ olğan vaziyetini muzakere etecek. «Sovet/rus akimiyetine qarşılıq» usulları da muzakere etilecektir.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
