Link açıqlığı

Çubarov qırımlılarnı Aqmescitte mahkeme binası yanına kelip, «fevral 26 işiniñ» iştirakçilerine qol tutmağa çağırdı


Qırımtatar Milliy Meclisiniñ reisi Refat Çubarov vatandaşlarını fevral 15 künü Qırım Yuqarı mahkemesi yanına kelip, Rusiye taqiqatı tarafından qabaatlanğan «fevral 26 işi» iştirakçilerine qol tutmağa çağırdı.

«Ahtem Çiygoz, Ali Asanov, Mustafa Degermenci ve digerleri tek özlerini degil de, qırımtatar halqınıñ namusını qorçalağanını añlaymız. Mahkeme yerine kelip, qaramanlarımızğa maneviy yardımnı kösterip olamağan, köstermege qorqqanlarnıñ da namusını, şu cümleden…» – yazdı Çubarov Facebookta.

«Er bir mahkeme toplaşuvına kelgen vatandaşlarıñızğa qoşulıñ, Ahtem Çiygoz, Ali Asanov, Mustafa Degermenciniñ tuvğanları yanında turıñız…», – dep qoştı o.

Bazarertesi künü, fevral 15-de, Qırım Yuqarı mahkemesiniñ binasında «fevral 26 işi» boyunca beşinci toplaşuv keçirilecek.

«Fevral 26 işi»niñ iştirakçileri – Ahtem Çiygoz, Mustafa Degermenci, Ali Asanov, Eskender Kantemirov, Talât Yunusov, Eskender Emirvaliyev, Eskinder Nebiyev – öz qabaatını tanımay ve işni siyasiy dep adlaylar.

2014 senesi fevral 26-da Qırım parlamenti yanında Ukraina topraq bütünliginiñ tarafdarları ve «Russkoye yedinstvo» («Rusiye birligi») firqasınıñ faalleri arasında teşkil olunğan miting keçti.

Qırım Rusiye tarafından işğal etilgeninden soñ Rusiye uquq qoruyıcıları mitingde iştirak etken qırımtatarlarnı taqip etmege başladı.

Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı tarihiy adaletniñ tiklenmesi dep adlay.

XS
SM
MD
LG