Link açıqlığı

Vladıka Kliment qırımtatarlarğa qol tuttı ve Qırımda insan aqlarınıñ bozuluvından sebep qasevetini bildirdi


Kiyev patriarhatınıñ Ukrain pravoslav kilsesiniñ Qırım yeparhiyasınıñ idarecisi, Aqmescit arhiyepiskopı ve Qırım Klimenti İslâm dinini kütken Qırım vatandaşlarına qırımtatarlarnıñ evlerinde keçirilgen tintüv ve yaqalanuvlardan sebep yardımını bildirdi.

Destek sözlerini Vladıka Kliment Qırımtatar Milliy Meclisiniñ reisi Refat Çubarov ile telefon subeti devamında bildirdi.

«Sizni, Qırımtatar Milliy Meclisiniñ reisini, Qırımda soñ künleri devamında qırımtatarlarğa ve İslâm dinini kütken diger vatandaşlarğa nisbeten etilgen aq bouzuluvları sebebinden menim samimiy qasevetlerimini qabul etmege ve Qırım musulmanlarına bildirmege rica etem», – dep bildire Klimentniñ sözlerini Refat Çubarov.

Bunıñ ile Aqmescit ve Qırım arhiyepiskopı Qırımda Rusiye akimiyeti tarafıdan bu kibi areketlerniñ mümkün olmağanı aqqında bildirdi.

«Kiyev patriarhatınıñ Ukrain pravoslav kilsesiniñ Qırım yeparhiyasınıñ idarecisi olaraq insan namusını aqaretlegen ve insan aqlarını bozğan areketlerge qarşım. Akimiyet içün silâlı insanlarnıñ yerli sakinlerniñ evlerine sürip kirmesi ile bağlı areketler mümkün degil», – dep bildire Refat Çubarov.

Fevral 11 ve 12 künleri Qırımda qırımtatar faalleriniñ evlerinde tintüvler keçirildi. Uquq qoruyıcınıñ yaqalanuvı aqqında haber etken ediler. Qırımtatar Milliy Meclisi reisiniñ birinci muavini Nariman Celâlnı prokuraturağa çağırdılar. Uquq qoruyıcılar işbu vaqialarnı izaatlamay.

Qırımnıñ Rusiye FSB idaresi tarafından «Hizb ut-Tahrir» terroristik teşkilâtında faaliyet» cinaiy işiniñ çerçivesinde dört insan yaqalanğan. Bunı akimiyet tarafdarı olğan «Krıminform» haber agentligine Qırımnıñ Rusiye prokurorı Natalya Poklonskaya bildirdi.

Ukraina musulmanları diniy idaresiniñ reisi Said İsmagilov dey ki, fevral 11 künü qırımtatarlarnıñ evlerinde tintüvler Qırım musulmanlarını «terrorist» olaraq köstermek içün yapılğan. Bunı o, tintüvlerge oğrağan 12 insannıñ adını berip, Facebookta yazdı.

Aqmescit şeeri Kiyev rayon mahkemesinde fevral 11 künü yaqalanğan qırımlılarnıñ – Emir Üsein Kuku, Enver Bekirov, Müslim Aliyev ve Vadim Siruk – işi boyunca mahkeme toplaşuvı keçti. Olarnı Rusiye Federatsiyasınıñ CK 250 maddesi 2 qısmı boyunca qabaatlaylar («Terroristik teşkilâtnıñ teşkil etilmesi ve bu kibi teşkilâtta iştirak»). Mahkeme 2016 senesi aprel 8-ne qadar apis cezasını belgiledi.

Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı tarihiy adaletniñ tiklenmesi dep adlay.

XS
SM
MD
LG