«Ukrainskaya pravda» neşiri bildirgeni kibi, Roskomnadzor Rusiye territoriyasında bu neşirniñ saytına irişim sıñırlanğanı aqqında bildirdi. Bu bir yıl evelsi basılğan haberge bağlı, haberde Qırımtatar Milliy Meclisiniñ reisi Refat Çubarovnıñ Ukraina içün Rusiye tarafından vaqtınca işğal etilgen Qırımnı qaytarmağa müim olğanı aqqında aytqan edi.
Fevral 13 künü aşkâr olunğan beyanatta bildirilgeni kibi, resursqa irişim Rusiye Baş prokuraturasınnı 30.09.2015 senesi etken talabı sebebinden sıñırlanğan. İşbu talabı «kütleviy tertipsizlik, ekstremist faaliyetniñ etilmesine, nizamnıñ bozuluvı ile teşkil etilgen kütleviy tedbirlerde iştirakqa çağıruvlardan ibaret olğan» haberden sebep etilgen edi.
Neşirniñ bildirgenine köre, fevral 9 künü Roskomnadzor «Ukrainskaya pravda» ğa Qırımtatar Milliy Meclisiniñ reisi Refat Çubarov aqqında haber boyunca tenbini yollağan edi ve haberni acele silmege talap etken edi.
2015 senesi aprel 1 künü basılğan haberde Çubarov Rusiye tarafından işğal etilgen Qırımnı Ukrainağa qaytarmağa kerek olğanı ve ukrainlerni «beterine – Rusiye ile açıq cenkke azırlanmağa» çağırğan edi.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı tarihiy adaletniñ tiklenmesi dep adlay.
