Link açıqlığı

AQŞ Devlet departamentiniñ spikeri Joshua Baker Washington mevzimini tasdiqladı: AQŞ cezaları Minsk añlaşmaları yerine kelmegence lâğu etilmez, Qırımnıñ qanunsız işğali içün cezalar ise – Rusiye nezareti altında olğan ukrain yarımadası azat etilmegence.

Bunı Baker Radio Svobodağa bildirdi.

«Qırımnıñ qanunsız zaptı ve Donbassnıñ qanunsız işğali aqqında aytamız. Şunıñ içün biz Ukrainağa qarşı Rusiye istilâsı, (separatistlerge) arbiy yardım, Donbassqa qanunsız arbiy qarışuv aqqında aytamız. Amma Qırım aqqında biz unutmadıq. Diplomatiya baqışından Minsk añlaşmaları tek Donbassqa ait olğanını añlamaq kerek. Amma Amerika tarafından cezalar em Qırım, em Donbassta istilâ ile bağlı», – dey o.

Devlet departamentiniñ temsilcisi AQŞ ve Ukraina arasında işbirlik aqqında hatırlattı.

«AQŞ er vaqıt ukrain devletiniñ şerigi olacaq. Ukraina yaş Avropa demokratiyası ola ve Ğarp tarafından yardımğa muhtac. Ukraina Rusiye Federatsiyası ile de eyi munasebetlerni qurmağa ister edi, amma (Rusiye) añlamaq kerek, diger memleketniñ territoriyasına arbiy tehnikası ile kirmege mümkün degil», – qayd etti Joshua Baker.

Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı tarihiy adaletniñ tiklenmesi dep adlay.

XS
SM
MD
LG