Qırım Müftiyligi bu afta yarımada toprğanda musulmanlarnıñ evlerinde keçirilgen tintüvler ve yerli prokuraturanıñ bu insanlarnıñ yasaqlanğan teşkilâtlarğa alâqası bar olğanı aqqında bildirüvleri sebebinden QAMDİ Qırım musulmanlarınıñ menfaatı ve qanuniy aqarını qorçalamağa azır olğanını bildire.
Bu aqta Qırımve Aqyar musulmanlarınıñ diniy idaresiniñ saytında aytıla.
«Er angi tarafnıñ areketlerinde qanuniylik olmalı. Dindaşlarımıznı aqıl-ferasetke ve qanuniyetniñ riayet etilmesine çağıramız.Uquq qoruyıcı organlarnıñ areketlerinde bozuluvlar qayd etilse, Qırım Müftiyligi, zarar körgenlerniñ muracaatları boyunca, Qırım musulmanlarınıñ qanuniy aq ve menfaatınıñ qoruvında yardım etmege azır», – denile beyanatta.
Qırım Müftiyligde ukrain siyasetçilerini «Qırım musulmanlarınnı milliy ve diniy duyğuları ile oynamamaq» çağıralar.
«Musulmanlarnıñ din saasında aqlarınıñ qoruvı QMDİ vazifesi ola ve işbu aqlar bozulğan olsa, Qırım Müftiyligi olarnı qorçalay edi ve qorçalayacaq», – aytıla beyanatta.
Fevral 11 ve 12 künleri Qırımda qırımtatar faalleriniñ evlerinde tintüvler keçirildi. Uquq qoruyıcınıñ yaqalanuvı aqqında haber etken ediler. Qırımtatar Milliy Meclisi reisiniñ birinci muavini Nariman Celâlnı prokuraturağa çağırdılar. Uquq qoruyıcılar işbu vaqialarnı izaatlamay.
Qırımnıñ Rusiye FSB idaresi tarafından «Hizb ut-Tahrir» terroristik teşkilâtında faaliyet» cinaiy işiniñ çerçivesinde dört insan yaqalanğan. Bunı akimiyet tarafdarı olğan «Krıminform» haber agentligine Qırımnıñ Rusiye prokurorı Natalya Poklonskaya bildirdi.
Ukraina musulmanları diniy idaresiniñ reisi Said İsmagilov dey ki, fevral 11 künü qırımtatarlarnıñ evlerinde tintüvler Qırım musulmanlarını «terrorist» olaraq köstermek içün yapılğan. Bunı o, tintüvlerge oğrağan 12 insannıñ adını berip, Facebookta yazdı.
Aqmescit şeeri Kiyev rayon mahkemesinde fevral 11 künü yaqalanğan qırımlılarnıñ – Emir Üsein Kuku, Enver Bekirov, Müslim Aliyev ve Vadim Siruk – işi boyunca mahkeme toplaşuvı keçti. Olarnı Rusiye Federatsiyasınıñ CK 250 maddesi 2 qısmı boyunca qabaatlaylar («Terroristik teşkilâtnıñ teşkil etilmesi ve bu kibi teşkilâtta iştirak»). Mahkeme 2016 senesi aprel 8-ne qadar apis cezasını belgiledi.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı tarihiy adaletniñ tiklenmesi dep adlay.
