Ukraina Tış işler naziri cumaertesi künü bildirgeni kibi, Münchende «normand şeklinde» tış işler nazirlikleri reberleriniñ Ukraina vaziyeti boyunca munaqaşaları azırlıq seviyesinde keçti, şunıñ içün muayyen neticeleri yoqtır. Şu cümleden, o, şimdi Rusiye nezareti altında olğan yarımadada qırımtatarlarnıñ yaqalanuvı boyunca sualerge Rusiye tarafınıñ cevabı olmağanını qayd etti.
Bunı Klimkin cumaertesi künü bildirdi.
Nazirniñ malümatına köre, işğal etilgen Qırımda qırımtatarlarnıñ yaqalanuvı ve tintüvleri ve Donbassta Rusiye ordusınıñ bulunuvı aqqında suallerine Rusiye Tış işler naziri Sergey Lavrov cevap bermedi. Rusiye tarafından izaat şimdilik yoqtır.
«Bir qaç muayyen mesele boyunca añlaştıq, Ukrainada OSCE eyyeiniñ işi, havfsızlıq teminlevi, Donbass ve sıñırğa irişimniñ teminlevi. OSCE eyyetiniñ yolbaşçılığı ile çalışacaqmız», – dey Klimkin.
Ukraina prezidenti Petro Poroşenko Almaniyağa 52-nci havfsızlıq meselelerinden München konferentsiyasına iş ziyareti ile keldi, mında Avropa birligi, NATO, AQŞ devlet kâtibi John Kerry ve Avropa devletleriniñ yetekçileri ile körüşecek.
Ukraina tış işler nazirligi fevral 12 künü Qırımda qırımtatarlarnıñ evlerinde keçirilgen tintüvlerge öz qarşılığını bildirgen.
Fevral 11 ve 12 künleri Qırımda qırımtatar faalleriniñ evlerinde tintüvler keçirildi. Uquq qoruyıcınıñ yaqalanuvı aqqında haber etken ediler. Qırımtatar Milliy Meclisi reisiniñ birinci muavini Nariman Celâlnı prokuraturağa çağırdılar. Uquq qoruyıcılar işbu vaqialarnı izaatlamay.
Qırımnıñ Rusiye FSB idaresi tarafından «Hizb ut-Tahrir» terroristik teşkilâtında faaliyet» cinaiy işiniñ çerçivesinde dört insan yaqalanğan. Bunı akimiyet tarafdarı olğan «Krıminform» haber agentligine Qırımnıñ Rusiye prokurorı Natalya Poklonskaya bildirdi.
Ukraina musulmanları diniy idaresiniñ reisi Said İsmagilov dey ki, fevral 11 künü qırımtatarlarnıñ evlerinde tintüvler Qırım musulmanlarını «terrorist» olaraq köstermek içün yapılğan. Bunı o, tintüvlerge oğrağan 12 insannıñ adını berip, Facebookta yazdı.
Aqmescit şeeri Kiyev rayon mahkemesinde fevral 11 künü yaqalanğan qırımlılarnıñ – Emir Üsein Kuku, Enver Bekirov, Müslim Aliyev ve Vadim Siruk – işi boyunca mahkeme toplaşuvı keçti. Olarnı Rusiye Federatsiyasınıñ CK 250 maddesi 2 qısmı boyunca qabaatlaylar («Terroristik teşkilâtnıñ teşkil etilmesi ve bu kibi teşkilâtta iştirak»). Mahkeme 2016 senesi aprel 8-ne qadar apis cezasını belgiledi.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı tarihiy adaletniñ tiklenmesi dep adlay.
