Link açıqlığı

Qırım ve Aqyar musulmanlarınıñ diniy idaresi fevral 11 ve 12 künleri qırımtatarlarnıñ evlerinde keçirilgen tintüvlerni izaatladı. QMDİ matbuat hızmetiniñ beyanatında aytılğanı kibi, tintüvler «radikal diniy tariqat»larnıñ izdeşlerinde keçirildi.

«Qırım musulmanları diniy idaresi Qırım cumhuriyeti territoriyasında reberleri 2014 senesi fevral ayından soñ Qırım tışına çıqqan din başında, siyasiy areketlerniñ faaliyeti sebebinden qasеvet çeke», – denile QAMDİniñ beyanatında.

Müftiylikte şunı da qayd ettiler ki, Qırımda Rusiye qanuniyetiniñ pekitilmesi ile QAMDİ dindaşlarını Rusiyede yasaqlanğan islâm teşkilâtları aqqında haberdar etti, şu cümleden, «Hizb ut-Tahrir» firqası, Rusiye Federatsiyasında yasaqlanğan edebiyat cedveli aqqında. «Qanunnıñ ters küçü olmağanını nazarğa alıp, Qırım musulmanlarınıñ diniy yetekçisi Emirali Ablayev 2014 senesi baar ayında uquq qoruycı organlarğa işbu tariqatlarnıñ Ukraina zamanında etken faaliyeti sebebinden taqiqatnı toqtatmağa rica etti», – denile beyanatta.

Bunıñ ile QAMDİ diniy cemiyetlerniñ ğayrıdan qayd etilmesi ve «faaliyetiniñ bir tertipke ketirilmesi» içün eki yıllıq keçici müddet belgilengen edi.

«Amma «Hizb ut-Tahrir», vahhabi, salafilerniñ tarafdarları Qırımda ya gizli, ya açıq şekilde faaliyetine devam ete. Bu sebepten evlerinde tintüv ve qıdıruvlar keçirile, bu aqta Qırım prokuraturası haber etken edi», – deyler müftiylikte.

Teşkilâtta «qırımtatar halqınıñ milliy ve diniy duyğuları ile oynamamaq» çağırdılar. Müftiylikte deyler ki, Qırım musulmanlarınıñ qanuniy aq ve menfaatınıñ qoruvı boyunca «zarar körgenlerniñ» muracaatlarına seslenmege azırlar.

Ukraina tış işler nazirligi fevral 12 künü Qırımda qırımtatarlarnıñ evlerinde keçirilgen tintüvlerge öz qarşılığını bildirgen.

Fevral 11 künü sabasından Qırımda qırımtatar faalleriniñ evlerinde tintüvler keçirildi. Uquq qoruyıcınıñ yaqalanuvı aqqında haber etken ediler. Qırımtatar Milliy Meclisi reisiniñ birinci muavini Nariman Celâlnı prokuraturağa çağırdılar. Uquq qoruyıcılar işbu vaqialarnı izaatlamay.

Qırımnıñ Rusiye FSB idaresi tarafından «Hizb ut-Tahrir» terroristik teşkilâtında faaliyet» cinaiy işiniñ çerçivesinde dört insan yaqalanğan. Bunı akimiyet tarafdarı olğan «Krıminform» haber agentligine Qırımnıñ Rusiye prokurorı Natalya Poklonskaya bildirdi.

Ukraina musulmanları diniy idaresiniñ reisi Said İsmagilov dey ki, fevral 11 künü qırımtatarlarnıñ evlerinde tintüvler Qırım musulmanlarını «terrorist» olaraq köstermek içün yapılğan. Bunı o, tintüvlerge oğrağan 12 insannıñ adını berip, Facebookta yazdı.

Aqmescit şeeri Kiyev rayon mahkemesinde fevral 11 künü yaqalanğan qırımlılarnıñ – Emir Üsein Kuku, Enver Bekirov, Müslim Aliyev ve Vadim Siruk – işi boyunca mahkeme toplaşuvı keçti. Olarnı Rusiye Federatsiyasınıñ CK 250 maddesi 2 qısmı boyunca qabaatlaylar («Terroristik teşkilâtnıñ teşkil etilmesi ve bu kibi teşkilâtta iştirak»). Mahkeme 2016 senesi aprel 8-ne qadar apis cezasını belgiledi.

Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı tarihiy adaletniñ tiklenmesi dep adlay.

XS
SM
MD
LG