Qırımtatar Milliy Meclisiniñ reisi Refat Çubarov Qırım musulmanları müftisiniñ fevral 11 ve 12 künleri qırımtatarlarnıñ evlerinde keçirilgen tintüvlerden sebep olğan sessizligi boyunca çorlanuvını bildirdi. Bunı Çubarov müftige açıq muracaatında bildirdi.
«Müfti bey! Qırımtatarlarnıñ ve İslâm dinini kütken diger millet qomşularımıznıñ tintüvleri ve yaqalanuvlarından sebep Siziñ pek uzanğan sessizligiñiz sebebinden Qırımdan vatandaş ve dindaşlarımızdan kelgen bir sıra muracaatlarına cevabım yoq… Qırım musulmanlarınıñ ayatında tünevin ve bugün devam etken vaqialar aqqında haberiñiz bar olğanından iç şübem yoq. Amma ne Siz, ne Siziñ yardımcılarıñız adaletsiz taqip, ayırım ve işğalci akimiyet tarafından aşalavğa oğrağan Qırım musulmanlarına bir söz bile arqa olmadıñız», – yaza Çubarov, haber ete Meclisniñ matbuat hızmeti.
Çubarovnıñ sözlerine köre, bu sebepten o müftige açıq mektübi ile muracaat etti. Çubarov müfti ile siyasiy munaqaşa qurmağa niyet etmey, çünki şimdi bunıñ «ne yeri, ne saatı» degil, «şimdi qırımtatarlarnıñ, İslâm dinini kütken diger millet vekilleriniñ ayatı, sağlığı, namusı telüke astındadır».
Meclis reisi Qırım ve Aqyar musulmanları müftisine onıñ dindaşlarınıñ aqlarını qorumağa vadesi aqqında hatırlattı.
Ukraina tış işler nazirligi fevral 12 künü Qırımda qırımtatarlarnıñ evlerinde keçirilgen tintüvlerge öz qarşılığını bildirgen.
Fevral 11 künü sabasından Qırımda qırımtatar faalleriniñ evlerinde tintüvler keçirildi. Uquq qoruyıcınıñ yaqalanuvı aqqında haber etken ediler. Qırımtatar Milliy Meclisi reisiniñ birinci muavini Nariman Celâlnı prokuraturağa çağırdılar. Uquq qoruyıcılar işbu vaqialarnı izaatlamay.
Qırımnıñ Rusiye FSB idaresi tarafından «Hizb ut-Tahrir» terroristik teşkilâtında faaliyet» cinaiy işiniñ çerçivesinde dört insan yaqalanğan. Bunı akimiyet tarafdarı olğan «Krıminform» haber agentligine Qırımnıñ Rusiye prokurorı Natalya Poklonskaya bildirdi.
Ukraina musulmanları diniy idaresiniñ reisi Said İsmagilov dey ki, fevral 11 künü qırımtatarlarnıñ evlerinde tintüvler Qırım musulmanlarını «terrorist» olaraq köstermek içün yapılğan. Bunı o, tintüvlerge oğrağan 12 insannıñ adını berip, Facebookta yazdı.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı tarihiy adaletniñ tiklenmesi dep adlay.
