Kiyevde Ukraina Tış işler nazirliginiñ binası yanında fevral 12 künü Qırımda cumaaqşamı ve cuma künleri qırımtatarlarnıñ yaqalanuvı ve evlerinde olıp keçken tintüvlerge cevap bermege talap eteler. Aktsiyağa çoq insan qoşulmağan, nazirlikte Qırımda olğan vaqialarğa ayrı beyanat ile seslenmege vade ettiler.
«Ukraina Tış işler nazirliginiñ haber departamentiniñ reberi bizge tafsilâtlı beyanat tizilecegini vade etti, soy adları ile, Qırımda tünevinki vaqialarnıñ çerçivesinde insanlar nede qabaatlağanı ile», – dedi aktsiya teşebbüsçilerinden biri, jurnalist Ayder Mujdabayev.
O dey ki, işbu aktsiya ukrain akimiyetiniñ fevral 11 künü olğan vaqialarğa areketsizligi sebebinden teşkil etilgen.
«Biz bunı añlamaymız, Qırımda milliy menüsplik boyunca qanunsız taqipler olğanını añlamaq içün bir kün kerek olğanını añlamaymız. Ümüt etemiz ki, ileride ukrain memurlarını böyle vaqialarğa tezce seslenecek», – dedi o.
Fevral 11 künü sabasından Qırımda qırımtatar faalleriniñ evlerinde tintüvler keçirildi. Uquq qoruyıcınıñ yaqalanuvı aqqında haber etken ediler. Qırımtatar Milliy Meclisi reisiniñ birinci muavini Nariman Celâlnı prokuraturağa çağırdılar. Uquq qoruyıcılar işbu vaqialarnı izaatlamay.
Qırımnıñ Rusiye FSB idaresi tarafından «Hizb ut-Tahrir» terroristik teşkilâtında faaliyet» cinaiy işiniñ çerçivesinde dört insan yaqalanğan. Bunı akimiyet tarafdarı olğan «Krıminform» haber agentligine Qırımnıñ Rusiye prokurorı Natalya Poklonskaya bildirdi.
Ukraina musulmanları diniy idaresiniñ reisi Said İsmagilov dey ki, fevral 11 künü qırımtatarlarnıñ evlerinde tintüvler Qırım musulmanlarını «terrorist» olaraq köstermek içün yapılğan. Bunı o, tintüvlerge oğrağan 12 insannıñ adını berip, Facebookta yazdı.
Cuma künü, fevral 12-de, Kiyevde Ukraina Tış işler nazirligi binasınıñ yanında qırımtatarlar Qırımda Rusiye mahsus hızmetleri tarafından qırımtatarlarnıñ evlerinde keçirilgen tintüvlerge cevap bermege talabı ile aktsiyağa toplana.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı tarihiy adaletniñ tiklenmesi dep adlay.
