Link açıqlığı

Bütündünya qırımtatar kongressiniñ icra komitetiniñ nevbetteki toplaşuvı Vilniuste keçecek – Çubarov


Bütündünya qırımtatar kongressiniñ icra komitetiniñ nevbetteki toplaşuvı 2016 senesi mayıs ayında Litvaniya paytahtı Vilniuste keçecek. Bunı Qırımtatar Milliy Meclisiniñ reisi Refat Çubarov bildirdi.

«2016 senesi fevral 11-de Kiyevde Ukraina prezidentiniñ qırımtatar halqınıñ işlerinden vekâletlisi Mustafa Cemilev, Qırımtatar Milliy Meclisiniñ reisi Refat Çubarov, Milliy Meclis azası Gayana Yükselniñ Litvaniya Cumhuriyetiniñ eyyeti ile körüşüvi olıp keçti… Körüşüv devamında mayıs ayında Vilniuste keçecek Bütündünya qırımtatar kongressiniñ icra komitetiniñ nevbetteki toplaşuvınıñ teşkiliy meselelrini muzakere ettik ve Qırımdaki tintüvler aqqında laf ettik», – yazdı Çubarov Facebookta.

Onıñ aytqanına köre, Litvaniya yarımadada qırımtatarlarnıñ aqlarınıñ qoruvı içün halqara şekillerniñ teşkil etilmesi boyunca teşebbüske qol tuttı.

Fevral 11 künü sabasından Qırımda qırımtatar faalleriniñ evlerinde tintüvler keçirile. Uquq qoruyıcınıñ yaqalanuvı aqqında haber eteler. Qırımtatar Milliy Meclisi reisiniñ birinci muavini Nariman Celâlnı prokuraturağa çağırdılar. Uquq qoruyıcılar işbu vaqialarnı izaatlamay.

Qırımnıñ Rusiye FSB idaresi tarafından «Hizb ut-Tahrir» terroristik teşkilâtında faaliyet» cinaiy işiniñ çerçivesinde dört insan yaqalanğan. Bunı akimiyet tarafdarı olğan «Krıminform» haber agentligine Qırımnıñ Rusiye prokurorı Natalya Poklonskaya bildirdi.

Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı tarihiy adaletniñ tiklenmesi dep adlay.

XS
SM
MD
LG