Link açıqlığı

Ukraina Tış işler nazirligi yanında qırımtatarlarnıñ evlerinde keçirilgen tintüvlerge cevap bermege talap etecekler


Cuma künü, fevral 12-de, Kiyevde Ukraina Tış işler nazirligi binasınıñ yanında qırımtatarlar Qırımda Rusiye mahsus hızmetleri tarafından qırımtatarlarnıñ evlerinde keçirilgen tintüvlerge cevap bermege talabı ile aktsiyağa toplana.

Aktsiya teşebbüsçilerinden biri – jurnalist, ATR telekanalınıñ baş müdiriniñ muavini Ayder Mujdabayev.

«Alem-aşkâre narazılıq olmasa, bir şey yapılmaz. Akimiyetniñ, şu cümleden Ukraina Tış işler nazirliginiñ (MİD), qırımtatarlarğa qarşı kütleviy ayırımlarnıñ başlanmasına tez ve açıq-aydın reaktsiyasınıñ olmaması mümkün degil», – yazdı o Facebookta ve lâqayt olmağanlarnı ukrain ve qırımtatar bayraqları ile MİDge kelmege çağırdı.

Qırım.Aqiqat mühbiri bildirgeni kibi, şimdi ukrain nazirligi yanında toplanğan insan çoq degil – insanlar qırımtatar bayraqları ile kele.

Ukraina musulmanları diniy idaresiniñ reisi Said İsmagilov dey ki, fevral 11 künü qırımtatarlarnıñ evlerinde tintüvler Qırım musulmanlarını «terrorist» olaraq köstermek içün yapılğan. Bunı o, tintüvlerge oğrağan 12 insannıñ adını berip, Facebookta yazdı.

Qırımtatar Milliy Meclisi qırımtatarlarğa qarşı ayırımlarnıñ yañı dalğası aqqında bildire. Bu aqta Meclisniñ Qırımda fevral 11 künü keçken tintüvlerniñ sebebinden aşkâr etken beyanatında aytıla.

Qırımnıñ Rusiye FSB idaresi tarafından «Hizb ut-Tahrir» terroristik teşkilâtında faaliyet» cinaiy işiniñ çerçivesinde dört insan yaqalanğan. Bunı akimiyet tarafdarı olğan «Krıminform» haber agentligine Qırımnıñ Rusiye prokurorı Natalya Poklonskaya bildirdi.

Fevral 11 künü sabasından Qırımda qırımtatar faalleriniñ evlerinde tintüvler keçirile. Uquq qoruyıcınıñ yaqalanuvı aqqında haber eteler. Qırımtatar Milliy Meclisi reisiniñ birinci muavini Nariman Celâlnı prokuraturağa çağırdılar. Uquq qoruyıcılar işbu vaqialarnı izaatlamay.

Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı tarihiy adaletniñ tiklenmesi dep adlay.

XS
SM
MD
LG