«Eurovision»Milliy yarışınıñ birinci yarı finalında ğalebe qazanğan Qırımdan ukrain yırcısı Jamala Qırım.Aqiqatqa onıñ işbu yarışta iştiraki aqqında tarif etti.
Yırcı aytqanı kibi, onıñ esas raqibi – özü. «Çünki esası – özüme keder etmemek, çünki duyğular keder ete ve, meselâ, yarı finalada özüme bir sıra itirazım bar edi, duyğularım ve köz yaşlarımnı tutıp olamay edim», – dedi Jamala.
«1944» – Jamalanıñ 1944 senesi qırımtatar sürgünligini añlatqan yırı «Eurovision-2016» ukrain yarı finalında güzel qarşılandı. Jüri azaları arasında olğan yırcı Ruslana qırımtatar yırcısını ayaqqa turıp alğışladı.
Jamala seyirci ve jüriden 18 baa alıp, «Eurovision-2016» Milliy saylavınıñ finalına keçti. Ukraina vatandaşları sms vastasınen rey berdiler. Qırım rey berip olamağanından açuvlanğan insanlar oldı. Qırımtatar Milliy Meclisi milliy yır yarışınıñ teşkilâtçılarına muracaatta bulundı.
Nevbetteki yarı final Ukrainada fevral 13-de olacaq, final ise – fevral 21-de. Seyirciler ve jüri reylerine köre «Eurovision-2016» yarışında Ukrainanı temsil etecek artist saylanacaq.
61-inci «Eurovision-2016» halqara yır yarışı Stockholmde (İsveçiya) mayısta keçirilecek. Bu sene yarışta dünyanıñ 43 memleketinden iştirakçiler qoşulacaq.
Keçken sene Ukraina «Eurovision» yarışında iştirak etmedi (memleketteki vaziyetten sebep ve artistni azırlamaq içün sermiya olmağanından böyle bir qarar qabul etilgen edi).
