«Qırım aqqında haberlerniñ TOP-5» leyhasınıñ iştirakçisi QHA haber agentligi Qırım ve Ukrainadan haberlerni endi dört tilde degil, altı tilde azırlaycaq. Bu aqta haber leyhasınıñ taqdiminde agentlikniñ baş muarriri Gayana Yüksel bildirdi.
O şunı qayd etti ki, yaqın vaqıtta agentlik şimdi qullanılğan rus, türk, ingliz ve roman tillerine daa eki Avropa tili qoşacaq. Amma olarnı aytmadı. Yükselniñ aytqanına köre, şimdi agentlik çarşını ögrene.
«Bunı qararnen etmeymiz. Auditoriyanı ögrenemiz. Misal içün, ne içün roman tili peyda oldı. Romaniyada qırımtatar diasporası haberlerimizni türk tilinde oquğanı aqqında bildik. Şunıñ içün onı til alanımızğa qoşmağa qarar aldıq», – dedi o Qırım.Aqiqatqa.
Yüksel şunı da qayd etti ki, tillerniñ artması agentlikniñ esabı ile yapılacaq. «Öyle de ukraina tarafını tutqan şahsiy haber agentligi olıp qalacaqmız… Bu leyhanıñ bütün zorluqlarını ve deñizaltı taşlarını añlayım. Em de, bu kibi leyhalar devlet bücetinden desteklenmeli… Ukrainada şimdi olğan vaziyetke köre, bugün bunı bizim kibi şerikler etmelidir», – dedi o ve ileride haberler qırımtatar ve ukrain tillerinde çıqacağını da qayd etti.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı tarihiy adaletniñ tiklenmesi dep adlay.
