Link açıqlığı

Qırımdan Elvina Razakovanıñ ailesi RT Rusiye matbuat vastası ile mahkemeleşecek ola – advokat


Aqmescitten Elvina Razakovanıñ ailesi RT Rusiye halqara haber kampaniyasına namus ve itibar qoruvı aqqında davasını açacaq ola, bunı Qırım adliyecisi Emil Kürbedinov bildirdi.

«Raşatudey – bu qızçıqnı İGİLge bağlağanda aqlı degil ediñ! Elvinanıñ ailesi raşatudeyge qarşı namus ve itibar qoruvı aqqında davasını açacaq ola», – yazdı advokat Facebookta.

Kürbedinov dey ki, Elvinanıñ ailesi ve özü salı künü Rusiye Taqiqat komitetiniñ Qırım idaresine barıp keldiler. «Uquq qoruyıcı organları tarafından er şey olduqça nezaketli şekilde keçti. Acele sorğunıñ keçirilmesinde öz siñir ve israrlığını uquq qoruyıcılar işbu işniñ Moskva tarafından «kontrol» etilgeni ile añlattılar. Çünki Elvina halqara qıdıruvğa ilân etilgen edi. Elvinanıñ özü sağ-sağlamdır, Allahqa şükür!», – yazdı advokat.

Aqmescitte yanvar 13 künü ğayıp olğan Elvina Razakova tapıldı. Bunı babası Abdulaziz Razakov bildirdi. Babasınıñ aytqanı kibi, qız Krasnodarğa özü ketken edi.

XS
SM
MD
LG