Ukrainada qırımtatarlarnıñ alem-aşkâre diplomatiyasınıñ strategiyasını azırlaylar, dep bildire Ukraina haber siyaseti naziriniñ Qırım işlerinden keñeşçisi Emine Ceppar.
Onıñ sözlerine köre, vesiqanı Qırımtatar Milliy Meclisi ve Qırım ile çalışqan teşkilâtlarğa tevsiye etecekler.
«Vesiqamız qırımtatarlarnıñ dünyada taqdimi ve aqlarınıñ qoruvı boyunca strategiyası ola. İş çerçivesinde şunı belgilediler ki, qırımtatarlar daima çekişken halq olaraq tanılmağa istemey. Mında şusı müim ki, facialı tarihqa baqmadan, halq öz aqları içün küreşmege devam ete, em de yarım asırdan ziyade sürgen küreşi yalıñız zulumsız şekilde olğan edi. Halqnıñ eñ büyük qıymeti – tasil. Aman-aman er bir qırımtatar gençi eñ azından üç tilni bile – ana tili, devlet ve rus tillerini», – dey Ceppar.
O şunı da qayd etti ki, fevral 5-6 künleri qırımtatarlarnıñ alem-aşkâre diplomatiyasınıñ strategiyası üzerinde çalışqan ediler.
«Biz Ukrainada çetel devletlerniñ diplomatlarını, jurnalist, qırımtatar faali ve Qırım yönelişinde çalışqan mütehassıslarnı topladıq. Bütün olarnıñ tevsiyeleri bu sene baar ayında taqdim etilecek stragiyanıñ qısmı olur», – dey Ceppar.
BMT tamır halqlarınıñ meselelеri boyunca Daimiy forumınıñ prezident muavini Оliver Loode halqara toplulıqnıñ qırımtatarlar aqqında az bilgenini qayd etti.
«Qırım işğalinden soñ qırımtatarlar kim olğanı ve işğalde tamır halqlarınıñ zemaneviy vaziyeti aqqında bilmege istegenlerniñ sayısı büyük oldı», – dedi Loode.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı tarihiy adaletniñ tiklenmesi dep adlay.
