Link açıqlığı

İçtimaiy ağlarda Kiyevde fevral 6-da olıp keçken «Eurovision-2016» ukrain yarı finalında Rusiye tarafından işğal etilgen Qırım sakinleriniñ rey bermege imkânları olmağanı muzakere etile. Jüri finalğa çıqqan birinci üç insannı sayladı, qırımtatarı olğan ukrain yırcısı Jamala eñ yüksek baa aldı. Qırımlılar içtimaiy ağlarda rey berip olamağanlarından sebep açuvını bildirdiler, Qırımtatar Milliy Meclisi bunıñnen bağlı milliy yır yarışınıñ teşkilâtçılarına muracaat etti.

«1944» – Jamalanıñ 1944 senesi qırımtatar sürgünligini añlatqan yırı «Eurovision-2016» ukrain yarı finalında güzel qarşılandı. Jüri azaları arasında olğan yırcı Ruslana qırımtatar yırcısını ayaqqa turıp alğışladı.

«Bugün muzıka yolunen Qırımnı coyğanımıznı añlamağa imkân berdiñ. Seniñnen beraber ağladım», – dep ayttı Ruslana Jamalanıñ çıqışından soñ.

Jamala seyirci ve jüriden 18 baa alıp, «Eurovision-2016» Milliy saylavınıñ finalına keçti. Ukraina vatandaşları sms vastasınen rey berdiler. Qırım rey berip olamağanından açuvlanğan insanlar oldı. Qırımtatar Milliy Meclisi milliy yır yarışınıñ teşkilâtçılarına muracaatta bulundı.

«Yarı finalda 166 biñ Ukraina vatandaşı rey berdi. Qırımlılar rey berip olamadı. Eminim, Qırımnıñ rey bermege imkânı olsa edi, eñ azından daa 100 biñ reyimiz olur edi. Qırım bunıñ kibi yarışlarda rey berip olamasa, bizler Qırım Ukraina olmağanını tanığan olamız. Qırımlılar Ukrainada yarı finalda ve finalda, em de «Eurovisionde» Ukraina vatandaşları olaraq rey bersinler dep, yarış teşkilâtçılarına mektüp azırlaymız. Tırışacaqmız», – dep ayttı Qırımtatar Milliy Meclisiniñ reisi Refat Çubarov Qırım.Aqiqatqa.

Yarışqa baracam-yoqmı farq etmez – bu ikâyeni tarif etkenimni is ettim. Yırlağanda qartanama yırladım
Jamala

Jamala qırımlılarnıñ qoltutuvını is etkenini bildirdi. Yırcınıñ Radio Svobodağa aytqanına köre, sürgünlik aqqında bu yır daa bir buçuq sene evelsi yazıldı.

«Pek yazıqsındım. Qırımda mühlislerim çoq olğanını bilem. Maña qoltutmaq içün bir çoq insan mesac yolladı. Ayttım olarğa – para masraf ettiñiz, smsleriñiz ep bir sayılmadı, olar ise yollağanını ayttılar. Qorantam, qartanam aqqında bir yır. Bunı yazmamaq mümkün degil. Onı yazğanda da, sanada çıqışta bulunğanda da bu ikâyeni yaşadım. Bu bağışlanğan bir yır. Onı yırlamaq zor oldı. Ukraina onı bu şekilde qabul etkenine quvanam – o qadar rey, sms, teessuratlar. Yarışqa baracam-yoqmı farq etmez – bu ikâyeni tarif etkenimni is ettim. Yırlağanda qartanama yırladım», – dep ayttı yırcı.

Qırımtatar yırcısı hatırlattı ki, onıñ qorantası işğal etilgen Qırımda yaşay ve o, olar içün pek qasevetlene. Yırcı 1944 senesiniñ faciasını yalıñız mayıs 18-de degil, er vaqıt aqılda tutmağa çağırdı.

«Qırımtatarlar işğal etilgen yerde bulunalar, olarnıñ alı pek zor. Olarğa basqı yapıla, olar ğayıp olalar. Men qorqam, tarih tekrarlanmasını istemez edim», – dep qayd etti Jamala.

Nevbetteki yarı final Ukrainada fevral 13-de olacaq, final ise – fevral 21-de

Nevbetteki yarı final Ukrainada fevral 13-de olacaq, final ise – fevral 21-de. Seyirciler ve jüri reylerine köre «Eurovision-2016» yarışında Ukrainanı temsil etecek artist saylanacaq.

61-inci «Eurovision-2016» halqara yır yarışı Stockholmde (İsveçiya) mayısta keçirilecek. Bu sene yarışta dünyanıñ 43 memleketinden iştirakçiler qoşulacaq.

Keçken sene Ukraina «Eurovision» yarışında iştirak etmedi (memleketteki vaziyetten sebep ve artistni azırlamaq içün sermiya olmağanından böyle bir qarar qabul etilgen edi).

XS
SM
MD
LG