Ukrain yırcısı Camalanı Yevrovideniye halqara yarışında öz «1944» yırını taqdim etse, Ukraina namı ve Qırım işğali mevzusını «inanılmaz seviyege köterir», dedi bazarertesi künü, fevral 8-de, Ukraina halq deputatı, Ukraina prezidentiniñ qırımtatar halqınıñ işlerinden vekâletlisi Mustafa Cemilev.
Bunı o fevral 8 künü oña «Rusiyede faşizmge stop» Putinge qarşı halqara koalitsiyası tarafından «Rusiye faşimzi ile küreşte yararlıqları içün» nişanınıñ taqdimi vaqtında bildirdi.
«Bu qızğa lâqayt degilim, bu istidat, Facebookta da oña rey bermege çağıra edim. Unikal, acayip sesi… «Yevrovideniye»niñ olğan qaidelerine köre – sanaat siyasetten uzaqtır, amma bu yırnıñ insaniy manası… O, anda, yırında, kimseni qabaatlamay, insanlarnıñ merametsizligi aqqında aytıla… Nasıldır bir yerni qazansa, Ukraina namı ve Qırım işğali mevzusını inanılmaz seviyege köterir», – dey Mustafa Cemilev.
Qırımdan ukrain yırcısı Camala «Yevrovideniye-2016» Milliy yarışında birinci yarı final vaqtında seyircilerniñ eñ çoq reyini qazandı – 9 ball. Bir 160 biñ ukrain vatandaşı rey berdi.
Camala jüriniñ de eñ büyük ballını qazandı – 9 ball. Böyleliknen, yırcı bütün iştirakçilerden üstün çıqtı.
«Yevrovideniye-2016» Milliy yarışınıñ birinci yarı finalı fevral 6 künü CTБ ve UA Perşiy telekanallarında kösterildi.
İştirakçilerge tek ukrain operatorınıñ kartoçkasından sms yollamağa mümkün edi. Yani, Qırımda Rusiye bağınıñ qullanıcıları rey berip olamadı.
Nevbetteki yarı final fevralniñ 13, final – 21 künü keçecek. Ğalip Ukrainanı «Yevrovideniye-2016» yarışında Stokgolmde temsil etecek.
