Rusiye Federatsiyasına qarşı halqara cezalar saqlanılsa, Rusiye Federatsiyasınıñ dağıluvını körermiz. Bunı Ukraina prezidentiniñ qırımtatar halqınıñ işlerinden vekâletlisi Mustafa Cemilev fevral 8 künü oña «Rusiyede faşizmge stop» Putinge qarşı halqara koalitsiyası tarafından «Rusiye faşimzi ile küreşte yararlıqları içün» nişanınıñ taqdimi vaqtında bildirdi.
Cemilev şunı qayd etti ki, Qırımnıñ işğalden azat etilmesiniñ tek arbiy olmağan stsenariyini baqmaq kerek.
«Arbiy (yarımadanıñ azat etilmesi – QA) qan aqmasına sebep olur, birinci nevbette, Rusiye işğalini tanımağan qırımtatar halqınıñ yoq etilmesini nazarda tutar. Cezalarğa ümüt besleymiz… Cezalarnıñ seviyesi deñişmese, yaqında Rusiye Federatsiyasınıñ dağıluvına şaat olacağımızdan şübem yoq. Bu er şey bir-bir buçuq yıl devam etecek, neticede tek Qırım ve Donbassnıñ degil de, Gürcistan ve Pridnestrovyeniñ azat etilmesini de körermiz», – dey Cemilev.
O şunı da hatırlattı, «Rusiye Federatsiyasınıñ Ukrainağa ücümi vaqtında memlekette ordu yoq edi». Cemilevniñ aytqanı kibi, «halq istilâcınıñ tişlerine urıp, onı toqtattı».
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı tarihiy adaletniñ tiklenmesi dep adlay.
