Link açıqlığı

«Yevrovideniye»niñ ukrain yarışında rey berip olamağan Qırım sakinlerine nisbeten adaletsizlik yoq etilmeli, milliy yarışnıñ finalında qırımlılar öz saylavını yapmaq kerek. Bunı Qırımtatar Milliy Meclisiniñ reisi Refat Çubarov bildire.

«Camalağa qol tutqanıñız içün sağ oluñız. Amma Qırım rey berip olamadı, Rusiye tarafından işğal etilgen Qırımda yaşağan biñlerce qırımtatarı, ukrainler rey bermek aqqından marum qaldı. Final yarışına qadar işbu adaletsizlik yoq etilmeli», – yazdı Çubarov Facebookta.

Onıñ aytqanı kibi, Meclis bazarertesi künü, fevral 8-de, milliy yarış teşkilâtçılarına mütenasip arizası ile muracaat eter.

«Qırım sakinleri finalda iştirak etmege aqlı… Bu maqsat ile çalışamız, Qırım – Ukrainadır!» – dey Çubarov.

Qırımdan ukrain yırcısı Camala «Yevrovideniye-2016» Milliy yarışında birinci yarı final vaqtında seyircilerniñ eñ çoq reyini qazandı – 9 ball. Bir 160 biñ ukrain vatandaşı rey berdi.

Camala jüriniñ de eñ büyük ballını qazandı – 9 ball. Böyleliknen, yırcı bütün iştirakçilerden üstün çıqtı.

«Yevrovideniye-2016» Milliy yarışınıñ birinci yarı finalı fevral 6 künü CTB ve UA Perşiy telekanallarında kösterildi.

İştirakçilerge tek ukrain operatorınıñ kartoçkasından sms yollamağa mümkün edi. Yani, Qırımda Rusiye bağınıñ qullanıcıları rey berip olamadı.

Cemala fevral 6 künü «1944» yırını taqdim etti.

Sanada gruppasız, eki back-yırcısı ile çıqışta bulundı. Seyirciler Camalanıñ yırını sıcaq qarşıladı. «Yevrovideniye-2004» ğalibi Ruslana Lıjiçko qırımtatar yırcısına ayaqqa turıp, şapıldattı.

Nevbetteki yarı final fevralniñ 13, final – 21 künü keçecek. Ğalip Ukrainanı «Yevrovideniye-2016» yarışında Stokgolmde temsil etecek.

XS
SM
MD
LG