Link açıqlığı

Herson vilâyetindе Qırımtatar Milliy Meclisinde yüz bergen patlavnı terakt olaraq tanıylar. Bunı Milliy politsiya vilâyet idaresinde bildireler.

Vaqia yeriniñ teşkerüvi vaqtında mütehassıslar granata parçası, alqasını tapqanlar. Tapılğan şeylerni Herson vilâyetinde SBU idaresine yolladılar, dep bildire politsiya. Тaqiqat devam ete.

Hersonda fevral 6-dan 7-ne keçer gecesi Herson vilâyeti Qırımtatar Milliy Meclisi temsilciligi binasına patlav aleti, granata attılar. Bunı Meclis reisi Refat Çubarov bildirdi.

«Qırımtatar Milliy Meclisiniñ yolbaşçılığı bu vaqianı Ukraina cenübinde, şu cümleden Herson vilâyetinde vaziyetniñ kerginleşmesi maqsadı ile yapılğan Rusiye tarafdarlarınıñ provokatsiyası olaraq tanıy ve Ukraina uquq qoruyıcı organlarından adiseniñ ögrenilmesini bekley», – yazdı Çubarov Facebookta.

Qırım Rusiye tarafından işğal etilgeninden soñ Hersonda QMC Ukraina prezidentiniñ temsilciligi de buluna. Bıltır sentâbr ayında belgisiz şahıslar temsilcilikniñ qapısı altına patlav aletini qoyğan edi, patlav yüz berdi.

Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı tarihiy adaletniñ tiklenmesi dep adlay.

XS
SM
MD
LG