Hersonda fevral 6-dan 7-ne keçer gecesi Herson vilâyeti Qırımtatar Milliy Meclisi temsilciligi binasına patlav aleti, granata attılar. Bunı Meclis reisi Refat Çubarov bildirdi.
Onıñ malümatına köre, patlavdan mağaz odasına qapı bozuldı, qurban yoq.
«Qırımtatar Milliy Meclisiniñ yolbaşçılığı bu vaqianı Ukraina cenübinde, şu cümleden Herson vilâyetinde vaziyetniñ kerginleşmesi maqsadı ile yapılğan Rusiye tarafdarlarınıñ provokatsiyası olaraq tanıy ve Ukraina uquq qoruyıcı organlarından adiseniñ ögrenilmesini bekley», – yazdı Çubarov Facebookta.
Milliy politsiya vilâyet idaresinde bildirilgeni kibi, patlav aqqında haber saat 2:45 peyda oldı.
Vaqia yerine birden taqiqat gruppası, Herson politsiya bölüginiñ Baş idaresiniñ yolbaşçılığı keldi.
Bildirilgeni kibi, binada belgisiz patlav aleti patladı.
Qırım Rusiye tarafından işğal etilgeninden soñ Hersonda QMC Ukraina prezidentiniñ temsilciligi de buluna. Bıltır sentâbr ayında belgisiz şahıslar temsilcilikniñ qapısı altına patlav aletini qoyğan edi, patlav yüz berdi.
