Avropa parlamenti tarafından Qırım boyunca qabul etken beyannamesi ameliy degil de, ğayeviy manasını taşıy, dep tüşüne Rusiye siyasetşınası İvan Preobrajenskiy. Bunı o Qırım.Aqiqat Radiosı efirinde bildirdi.
«Bir işarettir, er kes oña baqacaqtır. Qırım boyunca şahsiy mevamı olmağan devletler, Avropa birliginde olar ise alâ daa çoqluqnı teşkil ete, işbu işaretke baqacaqlar… Rusiye-Ukraina munasebetleri, Donbass cenki boyunca şahsiy mevamı olmağan devletler», – dey ekspert.
Avropa parlamenti Rusiye tarafından işğal etilgen Qırımda qırımlı, şu cümleden qırımtatarlarnıñ aqlarınıñ bozuluvını takbih etti. İşbu rezolütsiyağa Avropa parlamentiniñ deputatları Strasburgda fevral 4 künü qol tuttı.
Аvropa parlamenti fevral 4 künü qabul etken beyannamesinde Rusiye tarafından işğal etilgen Qırım üzerinde ukrain mustaqilliginiñ qaytarılması içün «Jeneva plüs» formatını teşkil etmek kibi ukrain teşebbüsine qol tuttı.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı tarihiy adaletniñ tiklenmesi dep adlay.
